#فراغ_لن_يملأه_أحد

#رانيا_بيومي

#دار_اكتب

رواية من النوع اللي بيخليك تعيش حياة ناس تانية كأنك واحد منهم.

رانيا بيومي قدرت تحكي قصة "كمال ونبيلة" من أول لحظة في طفولتهم لحد آخر لحظة في حياتهم، بحبكة هادية، لكن مشاعرها عالية جدًا.

الرواية كلها تقريبًا سرد، والحوارات قليلة، لكن ده ما قللش من قوة التأثير، بالعكس، كان فيه عمق في التفاصيل يخليك تتوقف وتفكر.

وأنا بقرأ، لقيت نفسي مش قادرة أحدد مشاعري تجاه الشخصيات. ساعات أزعل من نبيلة وأشوفها قاسية، وساعات تانية أرجع وأقول هي اتظلمت واتوجعت بما فيه الكفاية. الرواية خلتني أحس إن مفيش حد صح أو غلط طول الوقت، الحياة بتمشي بين ابتلاء وتأقلم.

الكتاب بيناقش فكرة العلاقات الأسرية وتأثير الأهل على أولادهم بطريقة مؤلمة وحقيقية. بيطرح أسئلة صعبة عن الحب، السيطرة، والاختيارات اللي مش دايمًا بتكون في إيدنا.

رواية مش بس مؤثرة، دي رواية بتخليك تعيد تفكيرك في حاجات كتير حواليك.

أنصح بيها جدًا.

تقييمي: 5/5