#أحمدمجدي
ثلاثية "الآن نفتح الصندوق" أول ما صدرت كانت مع دار ليلى وقراءتهم من زمان جدا ومن وجهة نظري كانوا من احلى المجموعات القصصية للراحل العظيم.
الكتب الثلاثة كانوا عندي بطبعاتها القديمة، لكن مع السنين والأيام فقدت الكتاب الأول ومتبقاش عندي غير الكتاب الثاني والثالث واللي كنت برجع اقرأ فيهم من وقت للتاني عشان التسلية السريعة وكسر بلوك القراءة.
الانطباع الأخير
وخلونا نبدأ مع الانطباع الأخير بعد قراءة الكتب الأول طبعة إلكترونية من خلال دار كيان للنشر.
وكما العادة أول ما وصلت للنهاية وخلصت المجموعة القصصية كنت بقول:
"رحم الله الكاتب أحمد خالد توفيق، رحم الله من علم الشباب القراءة والكتابة وألهم جيلا كاملا من بعده"
وكان في سؤال خطر في بالي:
"ليه المجموعة دي مش مشهورة زي باقي الأعمال؟؟ ليه مفيش مخرج أو منتج قرر يستغل العمل ده لحد دلوقتي؟"
وطبعا أنا مش هقدر أتكلم عن الانطباع الأول أو التوقعات في العمل ده لأنه مش جديد وكنت عارف بالضبط أنا داخل على أيه.
معانا غلاف جديد أبيض مع صورة لغراب أسود فخيم قاتم، طبعا من وجهة نظري فإن الغلاف مش معبر عن أي حاجة لكن يكفي اسم الكاتب على الغلاف وعنوانه.
وخلوني اتكلم عن الافتتاحية والمقدمة.
يبدأ العمل مع شخصية مدرس الأدب الإنجليزي دكتور محفوظ الذي يموت في شقة متواضعة وكل ميراثه في الحياة هو صندوق خشب.
الصندوق الأول أو الكتاب الأول عبارة يحتوي على 25 قصة في عالم ما وراء الطبيعة.
كل القصص مختلفة ومميزة وما بين الشرق والغرب وطبعا هتلاقي مصاصين دماء وآكلي لحوم البشر وغيلان وزومبي وكمان فضائيين وغيره وغيره.
عندنا شر داخلي وشر خارجي وعندنا كُل حاجة هتخليك مبسوط لو بتحب الرعب.
عندنا ميزة في الكتاب الأول والثاني والثالث هو إن القصص كلها غير مرتبطة ببعضها ومفيش أي روابط ما بين القصص غير الرعب والإثارة والغموض والتشويق وكمان إن نهاية القصص مفتوحة أو خلوني أقول إنها قصص من غير نهاية مقفولة.
ممكن ببساطة تحط النهاية اللي أنت تحبها.
ويلا بينا نتكلم عن العمل وفكرته.
من وجهة نظري الشخصية إن العمل كان عبارة عن تجربة مختلفة للكاتب الراحل أحمد خالد توفيق عن سلسلة ما وراء الطبيعة أو يمكن كانت أفكار لعالم ما وراء الطبيعة لم تكتمل،
ممكن الظن إن ثلاثية الآن نفتح الصندوق عبارة عن تجربة كان الهدف منها صناعة مسلسل منفصل الحلقات كل حلقة عبارة عن مغامرة مستقلة.
الثلاثية بشكل عام فكرتني بالمسلسل "أبواب الخوف" بتاع عمرو واكد.
وده معناه إن مش كل القصص في نفس المستوى لكن في قصص هتكون أقل من المتوقع وبعضها هتكون عظيمة والبعض هيكون متوسط.
عندي انا أغلب القصص كانت فوق المتوسطة وناردا هي القصص أقل من المتوسطة.
أنا حسيت إن العمل عبارة عن حاجة كده زي مسلسل "Black mirror" لكن بدل من الحلقات في زمن مستقبلي إحنا عندنا مسلسل في عالم الرعب العالمي، وطوال فترة قراءتي للعمل كنت عمال أسأل ليه مفيش فعلا عمل زي ده عربي تم تنفيذه؟
طبعا الإجابة عن السؤال ده متشعبة وصعبة لكن خلوني أقول إن تحويل ثلاثية "الآن نفتح الصندوق" إلى مسلسل يمتد لعدد من المواسم حسب رؤية الإنتاج هو مشروع يحتاج منتج مغامر وفريق عمل من الشباب المتحمس الواعي.
تعالوا هنا نتكلم عن اللغة في العمل.
بكل تأكيد حافظ الكاتب على سلاسة اللغة العربية الفصحى البليغة في السرد والوصف والحوار وطبعا مع الحفاظ على اللغة المناسبة للناشئة والتفنن في إدراج التشبيهات والوصف المناسب الساخر.
ممكن تخرج من كل قصة بعدد من الكلمات المؤثرة والاقتباسات والمجال هنا مش هيتسع للمرور عليها.
وطبعا لو هنتكلم عن الحوار في القصص فهو كان قليل جدا جدا، معظم القصص كانت عبارة عن كتابات أو اعترافات من بطل المغامرة.
ولو هنتكلم عن بطل المغامرة فلازم نتكل عن الشخصيات في العمل وكلها كانت شخصيات واقعية مفهومة محددة ومرسومة بعناية شديدة جدا ومفيش شخصية مملة أو غريبة عن العمل.
أخيرا تعالوا نتكلم عن الخلاصة.
مجموعة "الآن نفتح الصندوق - الكتاب الأول -" أول كتاب في ثلاثية مظلومة إعلاميا ومش واخدة حقها في كم أعمال الكاتب أحمد خالد توفيق وهتفضل هي واحدة من أحب المجموعات القصصية للكاتب ليا وطباع بحاول اشرحها هنا من خلال مسابقة شغف الكتب وألفت النظر ليها.
ويمكن - بقول يمكن - يلتفت أي حد من صناع القرار للمجموعة دي اللي انا شايف أنها أفضل ما يمكن تحويله إلى مسلسل منفصل متصل عن الرعب.