طيب مبدأيا كده الكتاب ده هو أول كتاب - مش رواية - للكاتب والسينارست المشهور أحمد مراد والكتاب ده قرأته مع نهاية المرحلة الثانية استعدادا للمرحلة الثالثة - كان عندي أمل للتأهل - والحمد لله أمل عاشت وشافت اليوم ده وبجد بجد الحمد لله إن ربنا نصرني.

وخلوني هنا نبدأ المرحلة الثالثة مع مسابقة شغف الكتب مع كلمتين كده توضيح موقف.

دي أول مرة وأول سنة أدخل فيها مسابقات جروبات الكتب ومسابقة شغف الكتب وبصراحة شديدة ومن الآخر أنا دخلت بحماس وشغف حقيقي في المسابقة دي تحديدا عشان مشروع نهاية جديدة وعشان أنا عندي مشروع كامل كبير في الحتة دي وعشان كده كان كتاب "القتل للمبتدئين" هو أول عمل في قائمة المرحلة الأخيرة.

طيب ليه أصلا قرأت الكتاب ده مع أني توقفت عن القراءة للكاتب أحمد مراد بعد رواية 1919؟؟

ده سؤال مهم جدا وانا هعتبر نفسي سمعت السؤال واتفاجئت كمان.

والموضوع ببساطة وزي ما هو واضح إن العمل ده اللي بين أيدينا النهاردة مش رواية أصلا إنما هو كتاب أو نقدر نقول هو نتاج ورش عمل كتابة رواية وسيناريو كان عملها الكاتب المشهور.

وأنا فاكر كويس جدا حوار كان جمعني بالكاتب الراحل ضياء الدين خليفة - رحمة الله عليه - في مول سان ستيفانو في اسكندرية عن الكاتب أحمد مراد وإزاي إن مراد سيناريست شاطر جدا وكانت في علاقة صلة وتواصل ما بين صديقي الراحل ضياء وبين أحمد مراد وكان صديقي العزيز متحمس جدا جدا للكتاب ده عشان كان شغال على تحويل رواية شفرة الدولفين إلى سيناريو.

ولأني قررت كتابة نهاية جديدة لعمل ما فلازم أكتب صح والعمل ده أنا كنت متوقع إنه هيكون فارق معايا لكن هل كان فعلا عندي حق؟؟

طيب تعالوا زي العادة نبدأ المراجعة مع الأنطباع الأخير.

أول ما وصلت للنهاية وخلصت قراءة الكتاب لقيت نفسي بقول:

"أنا صح، أنا كنت صح" بصوت حسن شحاتة

ومش بس كده انا عن نفسي اتفاجئت، والله العظيم تنحت من كم المعلومات والهوامش اللي استخرجتها من الكتاب:

"أنا عمري في حياتي ما أخدت كم اقتباسات من كتاب زي ما أخدت من الكتاب ده"

الكتاب فعلا مليان نصائح حقيقية ملهمة فارقة في الكتابة والتعامل مع النصوص الروائية والسينيمائية.

يمكن بلا مناذع ده أول كتاب من نوعه يكون عامل زي مرشد لكتابة الرواية والسيناريو الجذاب.

ويلا بينا نبدأ المراجعة مع الانطباع الأول.

زمان - قبل قراءة العمل - أنا كنت فاكر إن القتل للمبتدئبن معناها تعليم الدراما للمبتدئين في المجال.

دلوقتي - بعد ما قرات العمل - عرفت إن المقصود بعنوان العمل هو إزاي تقتل الملل في عملك الروائي.

ومن وجهة نظر الكاتب إن قتل الملل في الرواية هو أهم عامل من عوامل نجاح العمل ومش بس كده، الكاتب كمان بيستعرض معانا أسباب دمار وفشل أي عمل روائي زي "قتل الطفل الفضولي اللي جواك - قتل الكاتب المبدع المبتكر - قتل النجاح في أن تكون كاتب"

ومش هتكلم عن إنطباعي عن الغلاف عشان معنديش إنطباع عام عنه، شايف إنه غلاف مبتكر في الفكرة والغرض منه تسويقي.

وتعالوا نتكلم عن البداية والافتتاحية.

في البداية الكاتب بيتكلم عن شرح تجربته في عالم الكتابة وإزاي بدأ وإزاي قدر يطوَّر من نفسه ومن رؤيته على مدار 12 سنة قدر فيهم يصدر سبع روايات وخمسة أفلام كلهم في قوائم الأعلى مبيعا أو مشاهدة.

بداية من أول صفحة هيبان معاك إنك داخل على ورشة كتابة خاصة مع الكاتب الأشهر حاليا على الأقل.

وبسرعة لقيت نفسي متفق مع الكاتب في كتير جدا من كلامه ولقيت نفسي عمال أقتبس من كلامه وخد عندك يا سيدي:

"لن يكون لك جمهور حقيقي إلا إن كان ما تكتبه يحمل قيمة حقيقية، وغير مُمل!"

"كتابة الرواية والفيلم فن يتطور بداخلك بالممارسة والإنتاجية اليومية، فلا تحكم على موهبتك من خلال مقال واحد أو قليل من الآراء التي تعارضك، وتذكَّر، فكل مَن بدءوا مدرسة جديدة في الإبداع تمت معارضتهم، قبل أن يصبحوا روادًا لتلك المدراس."

" لا تنظر وراءك، أتقن كتابتك، وأبطئ في الموافقة على كل كلمة فيها، لا تفاوض نفسك، واستفد من النقد «الحقيقي» الذي يُحلل عملك بشكل محايد، من شخص يقرأ بكثافة، أو محترف يمارس الكتابة الفعلية."

وده كله يا دوب واحنا في الأول والحقيقة إن الكاتب كان صادق جدا جدا مع نفسه ومع الجمهور القارئ له في عرض فكرته.

ويلا بينا نتكلم عن فكرة الكاتب.

فكرة الكاتب زي ما قلت قبل كده هي وضع الكاتب المبتدئ على الطريق الصحيح من وجهة نظره، بيتكلم عن الهدف من الكتابة والغرض الشخصي منها وطقوس الكتابة وقواعدها وأهدافها.

عندنا تأثر واضح بالسينيما العالمية ودراسة حقيقية لأسباب النجاح والتراجع فيها.

ممكن أكون مختلف مع كثر من أفكار وأعمال الكاتب أحمد مراد لكني متفق جدا جدا معاه في كل كلمة قالها عن عمل الكتابة نفسها وقتل الملل عند الجمهور بتاعك.

وبمناسبة الجمهور عندنا فصول كويسة جدا بتتكلم عن المتلقي سواء كان مشاهد أو قارئ وإزاي تقدر تجذب الجمهور ده وتتعرف عليه وإزاي تحافظ على مكانتك ككاتب عندك هدف ورؤية وفكرة.

صعب جدا جدا تلخيص الكتاب أو حتى نقله لكن ممكن نقول إنه دليل أو هو خريطة طريق هتساعد فعلا كل واحد مهتم بالكتابة الروائية أو السينمائية بكل وضوح وبشكل علمي وتجريبي واضح.

الكتاب بيستعرض معلومات كتير جدا لكن أجمل ما كان فيها بالنسبة ليا أنا.

هاجس الفكرة المُسيطرة.

السرد وطريقة الحكي.

البناء المتصاعد للأحداث.

خلق حبكة متماسكة.

صناعة الشخصيات في العمل.

كتابة المَشاهد بطريقة درامية مؤثرة.

مواكبة التطور وعالم المنصات الرقمية.

في نهاية الكتاب او في أخر ثلث هنلاقي سيناريو فيلم «الفيل الأزرق 2».

وهنا يلا نتكلم عن اللغة في العمل.

العمل معتمد في الأساس على العربية الفصحى البسيطة مع تطعيم بالعامية وعندنا الحوار بالعامية في جزء السيناريو.

مفيش تلاعب باللغة أو تراكيب صعبة عشان ببساطة مفيش اهتمام بالغة على قدر الاهتمام بالمعلومة وتوصيلها للقارئ.

لما بناخد من العمل اقتباس بيكون عشان المعلومة مش علشان جودة اللغة.

وخد عندك تاني مثلا:

" فن السينما فن بصري، القوة فيه تأتي من ابتكار وسائل «خارج الصندوق» للوصول للمعنى. "

"الغرض من المشهد كوحدة هو إما تحريك القصة إلى الأمام، وإما الكشف عن معلومات جديدة حول الشخصية."

"تعلَّم كيفية خلق خصم يهاجم نقاط ضعف بطلك، ويُجبره إما على التغلب على ضعفه والنمو، وإما أن ينجح في تدميره."

" يجب أن يكون خصمك متقدمًا بخطوة عن بطلك، لجعل مُهمة البطل في تحقيق هدفه صعبة."

" التحدي الذي يواجه معظم الكُتَّاب، هو تطوير سلسلة متصاعدة من الأحداث والعقبات التي تواجه البطل خلال رحلته، ثم وضع نهاية مُرْضية للجمهور الذي جذبته الفكرة من البداية. "

" أنا أعرف أنك تحب أبطالك، ولكن، أفضل شيء يمكنك القيام به من أجلهم ومن أجلي، هو عدم إظهار أي رحمة. استمر.. كن ساديًّا، ولا تسمح بالملل أن يتوغل مللي متر واحد تحت جلد قُرائك."

وأخيرا تعالوا نتكلم عن الخلاصة.

الكتاب ده مدهش وهو فعلا أفضل بداية ممكن الواحد يبدأ بيها ما دام ناوي يكتب نهاية جديدة لعمل ما.

أكيد هيكون عندي نسخة ورقية من الكتاب ده وهيكون عندي كمرجع في البيت.‏

أنا برشح الكتاب ده فعلا لكل كاتب مبتدئ أو قارئ حابب يتعمق في فنون الكتابة.