عدد اول جيد جدااا لسلسلة اتوقع واتمنى لها النجاح الكبير♥️..

نبذة مختصرة عن الفكرة العامة.. ابطالنا يحيي ومريم.. الاتنين طيارين، لكل منهم صفات او ممارسات غريبة شوية.. على سبيل المثال (يحيي) عنده قدرة انه يشوف احداث او بمعنى اصح هي ((جرائم)) هتحصل في المستقبل 🤔 ودا بيخليه يسمتع لاستغاثات المجني عليهم!! دا غير انه بيتهم بأمور غريبة زي الاسقاط النجمي والتنويم المغناطيسي

(مريم) مثلا.. عندها نزعة سادية بتخليها تحس بنشوة وهي بتشوف فديو فيه قتل، بل.. ولها تجارب مباشرة وهي طفلة🫢

وبنشوف ازاي الاحداث بتجمعهم سوا ببعض، وهل هيكون طريقهم واحد ولا هيتفرقوا ؟!

⚠️ يصلح العمل لمن هم +16 ⚠️ طبعا هو العمل بيناقش قضايا خطيرة تستاهل تبقي +18 لكن الكاتبة كالعادة بتعرف تعرض وجهة نظرها دون الخوض في تفاصيل وفي ذات الوقت انت كقارئ بتكتفي... ف ستاشر كويس يعني😂

العمل عجبني جداا، سرد ممتاز وسلس.. العمل بيمشي عن طريق انه يسرد فصل من وجهة نظر يحيي والتاني لمريم عن طريق السرد من منظورهم هما (راوي متكلم).. ودا عمل حميمية وتعلق بالشخصيات... وكان جميل وذكي جدا في طريقة استخدامه.. لأن ساعات كان حدث يدور في مكان واحد هما الاتنين موجودين فيه، فكنا بنشوف الحدث دا من وجهة نظر الاتنين... وهكذا

الوصف بشكل عام (كمكان واشخاص ومشاعر) كان من جيد لجيد جدا، وكنت اتمنى في بعض الأجزاء زيادة الوصف (المكاني) عن كدا شوية.

العدد دا بيناقش عدة قضايا مجتمعية زي اطفال الشوارع، مخدرات.. واخيرا الوحش الكبير (الديب ويب) واعتقد ان كل عدد هيناقش او هيمسك قضية معينة

العمل كرواية ممتع جدا.. الرتم كان هادي في الاول ولكنه ظبط بعد كدا..

جرعة التشويق كويسة (لكونه العدد الاول لسلسلة) وآه، تصنيف العمل في المقام الأول جريمة، يعني عامل الغموض والتشويق شيء مهم

والكاتبة نجحت في دا بدرجة كبيرة.. ومنتظر المزيد من التشويق ف الاعداد القادمة.

اسم العدد غريب شوية وكذلك مع الاعلان عن اسم العدد الثاني نكتشف ان السلسة هتكون بأسماء غريبة شوية.. ولكن على الرغم ان في محاولة لشرح او حتى الاستعانة بأسم العدد في الأحداث إلا كان مبهم شوية..!

اما نشوف بقا (انتزاع شعرة حصان) هيروح بينا لفين😂😂

كعادة شيرين هنائي بتعرف تقدم وجبة لذيذة، تمتعك كقارئ وتناقش قضيايا مجتمعية واجتماعية في إطار (رعب، جريمة، تشويق، ....إلخ

أياً كان القالب هي قادرة على صنع عمل جميل..