"صنايعية مصر...بين الونس والأرشيف المصري المحفوظ في الوجدان"

من جديد مع "صنايعي الونس" عمر طاهر، الكتاب الثاني لصنايعية مصر"

ف البداية خلوني أعترف إني كنت واحدة من الناس اللي منتظرة جدا الجزء الثاني من الكتاب، ف نفس الوقت مترقبة وبسأل نفسي"ياترى هيكون بنفس قوة الكتاب الأول ولا لأ؟"

والسؤال دة أخدت إجابته مع بداية الفصل الثالث

ف الكتاب الثاني كانت الرحلة مع حوالي 30 شخصية "صنعت" تاريخ مصر مقسمة على 13 فصل ببراعة

بنشوف ف الفصل الأول حكاية"محمود الطاهري" صنايعي التكييف"بلدياتي وأفتخر" وبنتعرف على قصة كفاحه من أول لأخر لحظة ف حياته، "بديع صبحي" صنايعي الأفلام الهندية اللي أغلب جيلنا اتربى وهوة بيتفرج عليها، بنشوف الرحلة من أول فيلم أسباب اتجاهه للسينما الهندية لحد النهاية وسطوة الأفلام الأمريكية على الساحة، هنا تحديداً كنت بشوف جزء من طفولتي وفترة المراهقة بتتعرض قدامي

على مدار باقي الفصول بنتعرف على شخصيات كتير، لفتني منهم مجموعة زي"علي ورمضان شرش" صنايعية ورش الكرة، دي برضة أخدتني لفتة الإبتدائي والجلسة الأسبوعية لينا حوالين الست والدتي وهيا بتلمع لنا الجزم بالورنيش واللي كان ليه فوطة معينه، كل واحد مستني جزمته تتلمع عشان يركنها ف مكانها ويصحى يلبس ويلحق الطابور، أو هنتأخر كلنا

و"عبدالعزيز علي وشركاه" صنايعية الشيبيسي، شفت هنا قصة كفاح وبحث عن عوامل النجاح ودراسة من أصغر لأكبر تفصيلة، لحد اندماج الشركة مع"لايز"...الفصل دة بالتحديد خلاني دورت على إعلانات شيبسي القديمة وشفتها وانا ف حالة نوستاليجيا جميلة جداً

كمان كان"الفصل السادس" كله ممتع بالنسبة لي، بحكم شغلي بتعامل مع"محرم باخوم" كل فترة، ف كان ممتع جداً إني أعرف الحكاية كاملة وتأثير المكتب دة على حياة وتاريخ بلد بحالها

الفصل التاسع واللي كان الحديث فيه عن"كامل البوهي" صنايعي إذاعة القرأن الكريم و "الشيخ الحصري" صنايعي خدمة القرأن، الفصل دة حرفياً"يتدرس"، إيه الجمال والإخلاص دة، الاثنين دول هيفضلوا مأثرين ف حياتنا لحد نهاية التاريخ، قصتهم أخدتني لذكريات طفولة وإذاعة قرآن مبتتقطعش ف البيت ولحد النهاردة أي راديو ف أي بيت مصري له ذكرى مع إذاعة القرآن

مجموعة مميزة، كان ختامها مسك مه سيدات السويس وعلى رأسهم الحاجة"كريمة يس"، يا الله على الملحمة دي

عجبني ف الكتاب جدا التقسيم، فكرة ان كل فصل وراه ملحق صور كانت ممتازة لأنها زودت الإندماج بدون م اتفصل واور ف اخر الكتاب ع الصور، التقسيم نفسه وربط الحكايات مع بعض بالتسلسل دة كان هايل، المعلومات كانت وافية ومكتوبة بشكل سلس وجذاب، حكاية واحدة بس اللي حسيتها مبتورة نوعا"أحمد مجاهد" محسيتش اني شبعت منه او عرفت عنه بالدرجة الكافية، الغلاف رائع بكل المقاييس

ف المجمل كتاب مهم جدا...تبقى محتار تقرا بسرعة وتستفيد بس الكتاب يخلص، ولا تقراه على مهلك؟؟؟و ف الحالتين هتتبسط بالمحتوى

أستاذ عمر...شكراً ليك على البهجة والمتعة والمعلومات القيمة والبحث الدؤؤوب...كتاب رائع