اقتباسات مصطفى إبراهيم

ورا كل كلمة سِبتها وطِلعتْ

‫ فيه كلمتين ما رضوش

‫ ورا كل دمعة سِبتها ونِزلتْ

‫ فيه دمعتين ما رضوش

‫ ورا كل كاس أحزان

‫ فَضِّيته بالنسيان

‫ فيه ألف كاس مليان

‫ بِيزيدوا ما بِيفضوش

أنا أحسن واحد يقدر يقنعك تحكي.. وما بِيحكيش

‫ أنا أحسن واحد يقدر يقنعك تبكي.. وما بِيبكيش

‫ أنا أحسن واحد يقنعك تفرح

‫ وأحسن واحد يقنعك تجرح

‫ أنا أحسن واحد ميت

‫ يقدر يقنعك…

‫ تعيش

‫ما عملش حاجة تستحق الذِّكر

‫غير انه واقف لسه على رجليه

ودي ناس تعرف تبيع الآه

‫زي ما بتعرف تبيع اللأ

‫الميديا بائع حق.. متجول

حياتك.. مهمة لبياعين الحلم

‫وَفاتك.. مهمة لبياعين القُرَص

زعلان ما تزعلشي بقينا ألف فريق

‫وان زِدنا واحد نبقى زِدنا غريق

‫في بحر الكدب والتلزيق

زي اللي شاف الفيلم مِيت مرَّة

‫وداخله تاني

‫مجاملة لصحابه

فيه شفرة جوَّانا لسه ما اتفكتش ..

‫وقدامها لسه كتير

‫أنا آخر تايب ف صِحابي

‫وآخرهم ف الصلاة ف التسليم

‫وف دور المدرسة في التطعيم

‫وف وقت السين ‫أنا آخر جيم

‫أنا جرح قديم. كان مِتغطِّي

‫إكمني مِشَتِّي ولابس كُم

‫سَبِّتني الدنيا بستين أُم

وسَبِّتلها ميت مِلة ودين

‫ولحد ما تمِّيت ست سنين

‫أنا كنت بحِب البني آدمين

‫وكِرهت الناس مِن بَعدِيها

‫علشان نَسُّوني أنا أصلًا مين

‫‏فيلم طويل‏ ‫الناس اللي أيامها بتشبه بعضها ‫وحياتها حاجة ‫بين المسلسل المتعاد والكوميديا الفارص (***) ‫مزيج بين الأمل والصبر ‫حاجة ما بين السواقة وبين ركوب القطر ‫بين المعافرة والتسليم ‫خلطة ما بين آمال بُكره ‫على أماني عودة امبارح

مختل؟

‫يمكن يكون مختل

‫كئيب؟

‫مش شرط يبقى كئيب

‫جايز يكون زهقان

‫م الليالي اللي تشبه بعضها

‫ومن كل شيء متعاد

‫م الكلام والناس والعقل والمعقول

‫قرر ف لحظة يقلب العدَّاد

‫وينط في المجهول

العالم بيتقسِّم بيوت ..

‫العالم بيتقسِّم لبني آدم ولبنكنوت ..

‫مكتوب على شهود البلاد ..

‫الممسوحين بأستيكة ..

‫أنتَ حر ..

‫ما لم تضر ..

‫أمريكا

ساب حكاياته للي حاكيها ‫وفضَّى حياته م اللي ماليها ‫ساب الدنيا بكل ما فيها ‫بعد ما جرَّب كل الناس ‫ ‫بعد امَّا ييجي. وهييجي حتمًا ‫وبعد امَّا تبكي ‫وبعد امَّا تحزن ‫لو جه ف بالك تقرا كلامي...وحياة أبوك، الفاتحة أحسن

وكان فاهمني زيي وأكتر ‫وكنت أنا صاحبه الوحيد ‫من وكُنا صغيرين ‫اتناقشنا ف كل حاجة ‫كورة ‫فن ‫سياسة ‫دين ‫وله معايا. مِيت حكاية ‫وذكريات ملو السنين ‫ربنا يجمع ما بينا ف حتة أحسن. قول آمين

كل اللي قضُّوا عمرهم ..

‫عايشين ورا شباك إزاز ..

‫ف تأملات واستنتاجات ..

‫لقانون يكون من غير شواذ ..

‫يمشي على كل الحاجات ..

‫مفيهوش آراء ولا تأويلات ..

‫مفيهمش واحد للأسف ..

‫استنتجه غير لما مات ..

إهداء إلى بحر إسكندرية.. اللي نفذ الجريمة الكاملة .

(***)الكوميديا الفارص (farce comedy ): نوع من الكوميديا يعتمد على المبالغة الشديدة في الموقف وعدم منطقيته بكل تفاصيله .

قبل والد المولود اللي خلَّى الدنيا في جماعة

‫مين اللي كان موجود

‫قبل أول دقة ف الساعة؟

‫كان الزمان واقف ما فتحش حنفيته؟

‫ما جِرتش حواديته؟

زي مجرى النهر.

بعرف اقول ما اعرفش ‫وبعرف اقول شكرًا ‫وبعرف اقول للشعب العامل دُمتُم ذخرًا ‫وبقول للشعب العطلان معلش ‫أنا حاسس بيك ‫بتمنى الدنيا تدِّيني وتدِّيك ‫بتمنى الدنيا تفهمنا واحد واحد ‫أو تستنانا لحد ما أحزاننا تفارقنا ‫بحلم زيَّك أعيش مرتاح

‫وواحد ما اعرفوش بيحذَّر

‫من ضرر قلي البطاطس

‫اللي بتسبب كذا

‫وناس بتلفت نظري للأذى الواقع على أقليات الهند

‫من فضلك اعمل «send » لكل زملائك

‫وناس بتخرج م الحياة لأن تلفونها اتسرق

‫وناس بيدعوا ربنا ع الملأ