✍🏻لما الكاتب بيبقي فاهم و دارس كويس و عارف هو بيعمل إيه و مواكب للتطور في مجال الكتابة و حكاء بارع و يقدر يشدك ليه ساعتها بس بيعرف يجذب شريحة كبيرة القراء من مختلف الأعمار و حتي اللي توجهاتهم مختلفة في القراءة و ده اللي قدر يعمله الأستاذ محمد يوسف الغرباوي في عمله الجديد ( ثلاث جنازات ) .. و الله العظيم الكاتب أو الروائي اللي فاهم بيريح القارئ معاه علي رأي الاخ الغالي محمود عزت .

✍🏻مبدأيا بس العمل ياخد خمس نجوم مرتاح و عشرة من عشرة .

✍🏻العمل عبارة عن متوالية قصصية من 3 قصص قصيرة لثلاث أرواح لشخصيات وقت صلاة الجنازة علي جثامينهم و كل روح بتحكي قصتها من البداية حتي لحظة الوفاة و العمل السرد فيه بالعربية و لكن الحوار بالعامية و اللي كان موفق فيها جدا بدرجة إمتياز .

✍🏻القصة الأولي لعماد الشبح

القصة الثانية للدكتور أحمد مختار .

القصة الثالثة لرجل الأعمال فتحي المليجي .

✍🏻الجميل هو التدريج اللي قام بيه الكاتب في ترتيب القصص التلاته يعني بدأ بقصة بسيطة و كجريمة فحبكتها بسيطة و خالية من التعقيد و البلوت تويست فيها عادي لكن براعة الكاتب كحكاء متميز خلاه مش عادي ، هوب سوبلكس راح داخل بيك في القصة التانية و اللي تعتبر أقوي من الاولي و بسلاسه برضه هوووب سحبك معاه بسرده السلس علشان تلاقي نفسك غرزت في قصة قصيرة كابوسيه و ياخد خيالك في رحلة تتنقل فيها بين الزمان و المكان بيسر و تعيش في أحداث جريمة تغلب عليها أجواء الماورائيات و الظواهر الخارقة للطبيعة و تيجي بأه للقصة التالتة الرهيبة فعلا من فرط واقعيتها و الغوص في أعماق المرض النفسي لبطلها و عرض لفلسفة الصراع بين الخير و الشر جوه النفس البشرية ببراعة .

✍🏻اللي أقدر اقوله الكاتب الاستاذ يوسف محمد الغرباوي فعلا حكاء بارع و بيعرف يجذب القارئ و رجل عقله متفتح و مطلع علي طريقة تفكير الأجيال الجديده و مواكب للتطور مع قدرته المتميزة علي الحفاظ علي اسلوب الكتابة الأدبية الكلاسيكية في السرد مع استخدام موفق جدا للعامية في الحوار ، أسلوبه أصلا فكرني بواحد من الأساتذة المقربين لقلبي و هو الاستاذ يوسف السباعي .

بالتوفيق يا استاذ محمد و في إنتظار العمل الجديد بإذن الله 🙏🏻 .