اسم الرواية : روحي فيك
اسم الكاتب : أحمد عثمان
دار النشر : دار كيان
عدد الصفحات : 318 ابجد
التصنيف: رواية درامية ذات طابع نفسي
📖 أول سؤال جاء في بالي وانا بقرا الرواية هو ليه الكاتب أحمد عثمان يكتب كعمل روائي وهو خلاص صدر كمسلسل ، والسؤال الجوهري هل هحس بفرق بين الرواية والمسلسل وازاي الكاتب هيكسر أن شخص بعد ما شاف المسلسل وعرف الأحداث يرجع يقرا الرواية يكون عندها نفس الشغف علشان يكمل الرواية.
الرواية من اول ما تمسكها في أوائل صفحاتها وبالتحديد مع بداية الفصل الأول ونهايته هتلاحظ معلومة مهمة جداً وهي تكنيك التقطيع السينمائي المتبع في الرواية والتنقل بين خطوط الدرامية في قفلات محددة تحافظ عليك منتبه طول الوقت ،والكاتب كان بيعلب علي الحته دي طول الوقت بعبقرية وهنا فعلاً كان مبدع ليه لأن الكلام ده أنتج عن تحسن واضح في وصف الشخصيات والأماكن تكسيد جميل جداً للعزبة والقصر ،وصف الشخصيات وانفعالاتهم وطريقة كلامهم.
🎬من طريقة كلامهم هنلاحظ نقطتين مهمين :
1- النقطة الأولى هي ضمير (هي ) المحطوك ما بين قوسين علي مدار الرواية وده ليه علاقة رئيسية بتقفيل الرواية اللي كان ممتاز بصراحة وغير متوقع بالمره وعاله علي النهاية المسلسل .
2- النقطة الثانية هي الأصوات فالاصوات بتختلف طبقاً للخلفيات التاريخية اللي بتتكلم مثل الست الريفية اللي بتضرب الودع ، الحارس اللي عنده حاجات غريبة بيعملها ، الشخصيات الأرستقراطية ، الشخصيات التي تملك الأموال ، الشخصيات المتطلعة وغيرهم كل واحد طريقة كلامه مختلفة عن الثاني ويساعدك انك تخلص العمل ده بسرعة كبيرة.
💫خطوط الرواية:
يوجد خط رئيسي اللي هو خط البطلة والتغير اللي حصل لها بعد الموقف اللي حصل في القصر ولكن في خطوط جانبية مثل خيانة الزوجية ودجل وعلم نفس وعلم زائف تجارب علي البشر وغيره كلها بتعمل تشويق للعمل علشان يجري في اثارة وتسارع وتشويق مع دمج بنهايات الفصول ،احنا ماسكين بنقفل الخط الدرامي في الجزئيه دي نقطة عالية علشان ادخلك علي أحداث في فرع ثاني ماشيين فيها عاليه برده ونقفل عالي ،فانت طول الوقت برغم أن الرواية مش أكشن ولا أثارة ولا جريمة بس الشخص متحمس حرفياً للأحداث وبيجمع ما بين الخطوط الدرامية دي المفهوم الرئيسي المقتبس من العمل الاصلي مشكلة الحب 55 مشكلة حب .
✍️النقاط الأساسية :
من اهم النقاط الأساسية اللي لفت نظري أن الكاتب أحمد عثمان مذاكرة للمرض النفسي والتفريق بينهما وبين المرض العقلي والتجارب علي البشر واعراض الإضطراب النفسي اللي بيظهر علي (سحر )علي فترات متقطعة فقدان الإحساس بالوقت النسيان وتغير الشخصية ردود الأفعال غير المتوقعة ، اضطراب وهلاوس وضلالات وتغيير في طريقة كلامها ما بين وقتين محددين كل ده علي مدار الرواية ،حافظ علي تركيزي هو انت من فاهم ده بيحصل ليه وعايز تفهم .
👥شخصيات الرواية:
كعادته الكاتب الشخصيات كان ليه نصيب من إسمها مثلاً هتلاقي سحر اللي ممكن تمشي سحر ، ثابت (حازم) اللي هو شخصية حازمه وثابت علي موقفه في البداية علي الأقل ، ندي اللي هي زي الندي وغيرهم .
والكاتب كعادته ودراسته القوية لفن السيناريو بيعلب بنقاط أساسية في الأعمال السيناريو الثقيلة وهي الربط والغرس أنه يربطك بحاجة معينة في أول الرواية مشهد لحاجة محددة أو شخص بيعمل حاجة انت مش فاهمها دلوقتي علشان تلاقي في الآخر لحظة التنوير اللي تكشفلك أن الأساس ده كان موجود من اول صفحة وأنت ما شفتهوش وده يخلي فيه متعة حلوة في القراءة الثانية للعمل واللي ساعد في ده هو التطور الدرامي القوي لشخصيات هذا العمل فأنت هتلاقي في صراع نفسي مثلاً متجسد في شخصية (الطبيب ثابث)المفروض أنه ثابت علي معتقدة الطب والعلم ويواجه ظواهر غير قادر علي تفسيرها بعقله فيصطدم بمعتقداته ويضطر أنه يخل بالقسم بتاعه وغيرها كثير من الشخصيات والحقيقة أن كمان اللي حافظ علي انتباهي وتسارع العمل ذكاء الكاتب في التنقلات مع بعض من الحظات الكوميديا البسيطة جداً تكسر هذا الجو من الاكشن والحاجات الخارقة اللي بتحصل .
🗣️رائي كقارئه في الرواية :
رواية روحي فيك هي رواية ممتازة سريعة الإيقاع مقتبسة من عمل درامي بترد علي حاجات مش موجودة فيه وبتغطي نقاط أساسية وبتديك اختلافات عن اللي أنت شفته في شاشة التلفزيون وفيها متعة مختلفة تماماً في القراءة.