"ميلاء".. رواية خميلة الجندي اللي خطفت قلبي من أول صفحة!
أسلوب السرد فيها كان بالفصحى، لكن الحوارات عامية، وده خلاها حقيقية وقريبة للقلب. بتحكي عن شلة أصحاب جمعتهم الصداقة والحب في مكان واحد، كلية الألسن – جامعة عين شمس، وبتاخدنا في رحلة جوه حياتهم، نشوف علاقتهم ببعض من زوايا مختلفة، كأننا بنتفرج على الكواليس اللي ما حدش يعرفها غير اللي عايشها.
الرواية بتأكد إن مفيش حد شبه التاني، ولا في ظروف متطابقة، كل واحد ليه حكايته، وده اللي خلاني أحس إنها بتلمسني بشكل خاص. اخترتها لأنها رجعتني لأيام الذكريات الحلوة، خليتني أحن للماضي، وأحس بالشوق لكل الأماكن اللي عشت فيها لحظات لا تُنسى.
الكاتبة خميلة الجندي قدرت توصلني للمشاعر دي لأنها كتبت عن أماكن كنت بروحها زمان، الخليفة المأمون، مصر الجديدة، العباسية، ميدان الحجاز، حديقة الميريلاند… كل مكان في الرواية حسّسني كأني راجع بالزمن لأول مرة عشت فيها الحب، العشق، الشغف!
ومن كتر ما الرواية لمستني، بقت من قائمة المفضلة عندي، وختمتها بشعور غريب… حنين وشوق، كأنها خلتني أعيش في عالم كنت مفتقده من زمان.🌿✨