الleadedshit أخرتها وحشة على الفاعل والمفعول به!
في كتابها اللي نزل مؤخرا المعنون بسجلات الليدر شيت استعرضت معانا كاتبته د/سالي العقاد اللي شغلت مؤخرا منصب الرئيس التنفيذي المنصة الأحب إلى قلبي، منصة أبجد، دراسات اتعملت على تأثير الإدارة والمدير على الموظف وسياساته االي بيتبعها على الموظفين من حيث الإنتاجية وصحته البدنية والنفسية.
مش من عادتي أكتب مراجعة بالعامية، بس الحقيقة لأن الكتاب نفسه مكتوب بالعامية رغم ما يحويه من معلومات قيمة وثري جدا بقصص كيانات ضخمة فشلت بسبب سوء الإدارة، ناهيك عن قصص لموظفين بارزين اتظلموا بسبب التعنت والصوت الفردي للرئيس التنفيذي أو للتمييز العنصري سواء حسب لون البشرة أو الجنس خصوصا مع فترات حمل ورعاية الطفل بالنسبة للسيدات.
حسيت أني حابة أتكلم عنه بالعامية.
الكتاب طول الوقت بيخليك تفتكر فترات حالكة بل وشديدة السواد الصراحة كل ما تفتكر المواقف اللي مريت بيها في حياتك واتظلمت فيها وماتقدرتش بما يكفي في محيط شغلك من قبل الإدراة، ويمكن لأن شغلني مافيهاش مجال للتفاوض على راتب مثلا لأني مش بشتغل في القطاع الخاص، إلا أننا مازلنا نعاني من تشدد مديرين فاكرين أن السيطرة في الزعيق والتحويل للتحقيق وممارسة سياسة فرق تسد، والتمسك بصوتهم فقط وفقدان القدرة تماما على التواصل.
الكتاب فيه مقاطع كتير هتضحك فيها بصوت عالي ومقاطع تانية هتلاقيك صعبت على نفسك فيها، أيوة بأمانة زي مابقولكم كدة، أصل مين فينا يعني اتعامل مع كل المديرين اللي مروا عليه في مشواره الوظيفي وكانوا أسوياء !!
المهم يعني، الكتاب لطيف جدا، سهل في الاستيعاب، فيه نتائج لدراسات كتير يعني ماكنش مجرد حكاوي، لأ كان فيه جانب علمي متقدم بشكل لطيف جدا ولغة سهلة.
للأسف الأخطاء الإملائية اتكررت في صفحات الكتاب.
وللأمانة ماتضايقتش كون الكتاب مكتوب بالعامية.