سخسنهاوزن

الرواية التي تدق على الرأس بالمطرقة

الرواية دي فتحتلي صراعين من الصراعات اللي كنت بتجادل مغ الناس كتير أوي فيهم وانا صغير وما صدقت قفلت باب الحوارا عشان مكانش فيه حد قادر يقنعني

لكن سخسنهاوزن أقنعتني !!

الصراع الأول : اتقالي وانا صغير ان ممكن أم تخلف وتكره ابنها بدون أي سبب ، انا طول عمري اعرف مثلا لو في مشاكل مع الزوج وطلاق ولما يجي المولود الأول الام بتبقى شايفاه تدبيسة أو لعنة عليها

لكن بدون سبب عمري ما اقتنعت

في الرواية هنا الفكرة بتطرح

اة في سبب موجود ، ولكنه ميخليش الأمور توصل لكدا

هنا بنلاقي أم نفسها جدا في الخلفة ، عشان فجأة تتحول خلفتها الوحيدة لكره شديد من الام ، واقتنعت، انا اشتريت الفكرة

الصراع التاني

لو شيلنا الانتمائات من الحروب والمعارك وكل أنواع الصراعات اللي في الدنيا بغض النظر عن الوطن أو الدين أو المذهب أو الدافع

لو شيلنا كل العواطف

هنميل لأي طرف فيهم ؟

ولا هندعو لوقف الحرب

لو مكناش منتميين مثلا للوطن سنة حرب ٧٣

هنميل لكافة المصريين اللي رجعوا ارضهم

ولا للجنود الصهاينة اللي بينفذوا الأمر وبس واتقتلوا زي ما قتلونا قبل كدا

تاني انا عارف ردك ولكن انا هنا بتكلم في حالة لو شيلنا كل الدوافع الموجودة العاطفية

لو هنتكلم بمنظور انساني فقط

الحقيقة حاولت اكتب عن الموضوع دا ومعرفتش لكن سخسنهاوزن بتطرح الفكرة

تعال أوريك صراع هتتعاطف فيه مع أطراف عمرك ما كنت تتخيل انك تتعاطف معاهم، وهتكرهم في نفس الوقت وهترجع تحبهم تاني وبعدين تكرهم تاني ، وكبه بمنظور واحد فقط

المنظور الإنساني

عجبني كمان طرح فهد للأفكار دي كلها

لغته وتشبيهاته

مش بيروح للتشبيهات النمطية التثليدية بتاعت خرجت الشمس من بيتها والجو دا

دا بيعمل تشبيهات جديدة مشوفتهاش عند حد غيره

ومثال على ذلك افتتاحية الرواية بكلامه عن فكرة الولادة ، ٤ جمل في منتهى العبقرية

عجبني كمان اللغة السلسة اللي بتوصل الفكرة وألفاظها المنتقاة بعناية عشان توصل المعنى المطلوب

------- سلبيات الرواية -----

في كام حاجة بصراحة بوظت عليا التجربة اللذيذة دي

البساطة في طرح النتائج

وهنا انا بتكلم عن حبكة روائية مشوقة ( الله أعلم القصة دي حقيقية ولا لأ )

أي نتيجة عاوزين نوصلها حبكتها بتكون سهلة جدا ، زي مثلا في حياتنا العادية لو الاوضة بتولع ؟ الحل بسيط ، افتح الباب

في العالم الروائي بقى الحلول دي بتبقى غريبة ، هو حل يبان منطقي ؟ ولكن طرحه غريب ،

من أول هنا في حرق لو حد هيقرأ

في الرواية بقى اتجسد دا ازاي

حبكة روايتنا ان البطلة هتكون من أقوى السادييات في الفترة دي عشان نوصل في الاخر لأقصى مراحل الذل

فكرة جميلة لكن وصولنا للغاية دي كان ضعيف جدا ، او خلينا نقول سهل أوي بدون النظر للترتيب المنطقي

١- فجأة بيتصدم والدها ان عندها قدرة عبقرية في الرسم الهندسي ( مع ان المفروض سرها معاه هو فأكيد كانت رسمت قبل كدا ووريته )

٢- بترسم رسم عبقري جدا لسجن عجز عن رسمه كل القادة والمهندسين

( مبرر غير منطقي بنسبالي / الرسم الهندسي لو في جزء من الموهبة فعلى الأقل لازم يكلل دا بدراسة لو فعلا هنقول هنعمل حاجة عبقرية عجز عنها عقول ألمانيا )

ولكن دي ممكن تعدي

٣- اللي كانت صعبة بنسبالي جدا وغير منطقية : تنصيبها قائدة للمعسكر دا ، بسبب ايع ؟ عشان هي اللي أسسته ، بصراحة مبرر غير منطقي ، الجيش في الفترة دي اختراقه مش بالسهولة دي ، والتأثير فيه بيكون صعب جدا ، وكمان من ست مش راجل

في فساد ، تحت أي مسمى حد هيتخلى عن منصب لمجرد انه يعين ست مكانه عشان هي اللي أسسته في الأصل ، كان ممكن نقول مسكت السجن بالميراث مثلا من والدها، لكن دا مظهرش في الرواية

٤- دخول السحر بشكل غريب عشان يحل مشكلة معينة ، وانسحابه بشكل أغرب عشان نرجع لضعف الشخصية عشان لازم في النهاية متكونش ساحرة عشان تواجه مصيرها

تدخل ميتافيزيقي غير مطلوب من وجهة نظري

٥- سهولة تحرير الأسرى

عمرها ما كانت بالسهولة دي ، في إي زمن وفي أي دولة ، عاوز الأسيرة دي ، اتفضل خدها ، محدش يأذيها ، تحت أمرك

مافيش كدا خالص

وطبعا المشاعر اللي بتتغير تحت تأثير الحب

فجأة ناس تحب بعض وفجأة ناس تكره ، كله لغرض الوصول للغاية

فعشان كدا بقول

فكرة عبقرية بأحداث جميلة جدا

حبكتها سهلة أوي وغير منطقية

اخر حاجة معجبتنيش هي محاولة فرض الكاتب مشاعرها عليا من خلال الجد

الجد كان بيتحكم في مشاعر ، يقولك تحب مين وتكره مين ، وتتعاطف مع مين لحد أنهو حدث وتبدأ تكره من أول فين

محبتش دا

كنت حابب ان للرواية تسبني أقرر مشاعري بنفسي

في النهاية انا كنت متوقع رواية رعب عادية لكاتب لسه في تجربته الأولى

لكن انا لقيت نفسي قدام تجربة فلسفية مميزة جدا لكاتب هيبدأ طريق قوي في اللون دا من الأدب ، واللي أعتقد هو وصله خلاص مع خامس رواية ليه

تقييم نهائي 3,5 من 5