"سكولا "هي حكاية بلد وحكاية جيل اتغير ورا جيل...
سكولا هي المدرسة اللي بتتشكل فيها ملامحنا وصفاتنا.. وذكرياتنا.. هي اللي بنتكشف الجزء الخفي من صفاتنا فيها.. وبنخرج صراعاتنا وبنتعامل بوشنا الحقيقي فيها.
↩️الرواية كأنها مسرح لمصر والتغييرات والأحداث اللي مرت عليها من 52 للنكسة.. لحرب 73.. هي حكاية أشخاص بتتحرك علي مسرح خلفيته أحداث تاريخية شكلت ولونت كل جيل.
الرواية كأنها مسرح لمصر والتغييرات اللي مرت عليها من 52 للنكسة.. لحرب 73
بتحكي عن أكتر الفترات حساسية وخصوصا بعد ما الحرب خلصت والمجتمع بدأ يتشكل ويتغير وملامح الشارع المصري بتتغير معاه بالتدريج.. في اللغة واللكنة والتفكيير..
يمكن فترة التمانينات كانت فترة تغييير كبيرة لملامح التفكير والكاتب وصف دا ببراعة من خلال اختلاف وتطور الشخصيات في جيل ورا جيل في الرواية كأن بتمشي بالتدريج وتحس بالتغيير.
نجح الكاتب في وصف صراع الاجيال في الرواية ما بين اللي طلعو قبل الحرب وعاصروا الملكية والحروب والهزيمة وبعدها النصر ومابين الجيل الجديد المتمرد.. اللي مش عارف يتكيف وبيحاول.. الجيل اللي مشافش الحرب وعايز ينطلق ويقلد الغرب.. الشوراع اللي بتختلف ومحلامحها بتتغير كل يوم.
علي الرغم انه شخصيات الرواية كتيرة والكاتب وضح وحط خريطة للشخصيات في أول الرواية.. إلا إنه كان لكل شخصية ملامحها وصفاتها المستقلة اللي بتميزها عن باقي الشخصيات..
شخصية شديد من أكتر الشخصيات اللي مقدرتش أحبها.. شخصية أنانية حقودة.
إبراهيم ابن شديد من أكتر الشخصيات اللي صعبت عليا.. يمكن سوء أبوه السبب فيه خلق منه نموذج وشخصية سيئة حاسة بالنقص.
إياد.. شاب صغير نفوذ والده من صغره وذكائه سخرت ليه كل حاجة.. خلقت منه شخصية فاسدة.. يمكن هو جواه ضحية.. كان محرك الأحداث ومحورها من التلت التاني ف الرواية.
الشخصيات النسائية في الرواية بيعبرو عن شكل المجمتع في الوقت دا.
🎲 اللغة كانت بالعامية بمعني انه هتلاقي كل شخصية بتتكلم اللكنة اللي بتعبر عن البئية اللي جاية منها.. يمكن دا خلي للرواية خلفية حية بتنوع اللجهات واختلاف وتطورها الملحوظ بين كل جيل.. لكن كان ف كلمات إلتبس عليا معناها ومفهمتش بعضها.
◀️أكتر المشاهد اللي حبيتها.. كانت مشاهد النهايات لما إياد واجه كل شخصية بحقيقتها.. كان مشهد رهيب جمع كل احداث الرواية فيه.. كان مشهد رهيب كشف وعرى حقيقة كل الشخصيات قدام بعض.. كان مشهد حي .. تحس انك شايفة وسامع وحاسس بمشاعر كل شخصية في اللحظة دي.