رواية نيورا

الكاتب : أحمد عبد العزيز

عدد الصفحات : 322

عدد أيام القراءة : 2 يوم

التصنيف : خيال علمي.. ديستوبيا.. فلسفية رمزية

طبعًا لك أن تتخيل يعني ايه أخلص رواية 322 ص في يومين وفي أيام امتحاناتي! 🙂

أول تجاربي مع الكاتب أحمد عبد العزيز وإن شاء الله مش هتكون الأخيرة ♥✨

عادة مش بحب أقرأ الأعمال اللي عليها ضجة كتير.. لسبب مش عارفاه.. بس مبحبش الحاجات اللي عليها دوشة كتير.. وغالبا يعني بنسبة كبيرة الأعمال بتكون overrated في الآخر

ولكن لسبب ما اتشديت إني أقرأ الرواية مش عارفة ليه؟!

وحقيقي أنا بشكر نفسي دلوقتي على هذه التحفة الفنية الأدبية اللي استمتعت بيها وتفاعلت معاها حد البكاء.. واللي من موقعي هذا وأنا لسه في بداية السنة بقول إنها هتبقي من أفضل قراءات 2025 السنة دي

بداية مش هتلاقي تصنيف مُعين للرواية.. الرواية خيال علمي.. ديستوبيا.. فيها اسقاطات كتير على الواقع الحالي فيما يتعلق بالكيان والمقاومة والاحتلال.. لا تخلو من جانب اجتماعي إنساني .. يتخللها بعض الرومانسية الراقية ♥✨

وتعالوا نتكلم عن هذه الرائعة الأدبية ✨

مع بداية الرواية.. كنت مشدودة جدًا.. كنت بقرأ فصل ورا التاني ورا التالت وأنا مش حاسه بنفسي.. الفكرة كانت عجباني جدًا.. وللأمانة الكاتب أجاد رسم تفاصيل العالم الجديد بشكل مبهر الحقيقة ودا اللي خلاني أتشد واندمج جدًا وأبقى حابة أعرف أكتر عن العالم دا ✨

كمان ال vibes بتاعت العالم دا فكرتني شوية بمسلسل النهاية ليوسف الشريف وأنا كنت من جمهوره الحقيقة 😂♥✨

مرورًا بقى بالمشاهد اللي كان فيها إسقاطات واضحة وصريحة للواقع الحالي والاحتلا*ل والكيان ودمجها مع فكرة الرواية الأساسية ( اللي بتتكلم عن الذكاء الاصطناعي وسيطرته على المستقبل) كان شيء أكثر من رائع الحقيقة

المشاهد الفلسفية اللي كانت بين نور وحسناء من أجمل المشاهد اللي استمتعت بيها جدًا

المشاعر الإنسانية على لسان نور كانت حقيقي عميقة جدًا وأثرت فيا جدًا جدًا 🥹♥✨

في شوية مشاهد عمومًا في الرواية كانوا عياط بس 🥲

الرومانسية كانت راقية وجميلة جدًا 🥹♥✨

كان فيه شوية بلوت تويست زي الفل 🙂

الحبكة كانت جيدة لحد كبير وإن كنت توهت شوية في الآخر بس الحبكة كانت كويسة جدًا

لغة الكاتب الحقيقة وسرده وأسلوبه أكثر من رائعة ومن أكتر الحاجات اللي استمعت بيها في الرواية ✨ لغة سهلة سلسة راقية عميقة تنساب كدا معاها وأنت بتقرأ..

عنواين الفصول كانت لوحدها تشويق وإثارة 😂🔥

فكرة QR code كان من أعجب وأمتع الحاجات اللي قابلتني أثناء القراءة وحقيقي دي لوحدها ليها تقييم خاص بيها.. من كثرة جمالها وإبداعها.. وشابو للكاتب على الأفكار اللي بره الصندوق دي ✨

وأخيرًا النهاية.. دي الحاجة الوحيدة اللي في الرواية مش عارفة أقيِّمها.. أنا عمومًا بحب اوي فكرة أنه الكاتب يربط بين رواياته ولكن هنا محبتش دا.. جائز لأنه مقرأتش نائل سويدان؟! ربما.. بس دا لا يمنع إني مفهمتش النهاية اوي وكان بلوت تويست غريب 🙂

لغاية هنا عزيزي القارئ وقف لو مكنتش قرأت الرواية لأنه هبدأ أحرق 🙂🖐

هتكلم عن نقطة محدش أتكلم عنها في الريفيوهات مش عارفة ليه؟! 🙂 هل لأنه كل الناس عميقة وأنا بس اللي شاعرية سيكا ولا ايه وعلى الرغم إني قد أبدو بمظهر الساذجة شوية بس لازم أقول 🙂

أنا النهاية فلقتني عياط والله.. يومين اكتئاب مش عارفة أبتسم فيهم من كتر تأثري بالنهاية 😭 وحاليًا كل ما بفتكر النهاية بحس إني عايزة أعيط تاني « ودي حاجة هنضيفها مع فكرة أني مفهمتش النهاية اوي والربط بينها وبين أحلام نائل سويدان»

على الرغم إنه المنطق والعقل بيقول إنه نور وفريد المفروض ميكونوش موجودين فعلًا.. وعلى الرغم إني بحب النهايات العقلانية أكتر حتى لو حزينة وكئيبة.. وعلى الرغم إني عارفة نهاية نور من أول صفحة في الرواية.. بس دا لا يمنع إطلاقا إني زعلت زعل عليه لا يُوصف 😭

حسيت له بالظلم جدًا.. هو علشان ذكاء اصطناعي تعملوا فيه كدا يعني 😭 ماهو ذكاء اصطناعي من لحم ودم وبيحس 😭

يعني عاش طول الرواية وحيد وحاسس بالوحدة بسبب بذرة الوعي اللي هما زرعوها فيه ?.. الراجل عاش ومات مشافش يوم عِدل في حياته يعني 😭

في المقابل حسناء ( أو إيمان) تم تعويضها عن كل التعب اللي شافته.. حتى نور بعد ما فقد شريحة الذكاء منسيش حبها 🥹.. الصراحة صِعب عليا نور جدًا

وعلى الرغم من تأثري الشديد بكل المشاكل والقضايا اللي كانت بتناقشها الرواية.. بس مقدرش أنكر إنه الجانب الإنساني دا أكتر حاجة اتأثرت بيها.. وخدتلي يومين اكتئاب زي الفل

المشهد اللي بيكلمها فيه في التليفون دا عياط بس والفيديو المصاحب ليه 😭

عامة مش هقدر أتكلم أكتر من كدا عن النهاية علشان معيطش تاني بس هختم ب دي 🥹

¶ وما ضير الرميم من نخر الدهور في أضلعه

وما مغنمه إذا انبثقت الرياحين من ثرى جنباته! ¶

وهي عمومًا رواية أكثر من رائعة ولو في تقييم أكتر من خمس نجوم كنت أعطيته ليها ⭐⭐⭐⭐⭐