فكرة انك تكتب رواية بتتناول احداث ما قبل ثورة 26 يوليو و الفترة اللي بعدها لحد حرب 6 اكتوبر 73 و كمان تقريبا نصف الاحداث بيدور في محافظة بورسعيد فكرة كلشيه اووي و اتعملت في افلام و مسلسلات كتير الي جانب اعمال ادبية بس انا مش قاري في النوع ده اووي.
قراءة العمل بالنسبالي كان تحدي مش عشان قلم الكاتبة جديد عليا و خايف من التجربة بالعكس انا بحب قلم رهام راضي جدا من اول مراءة فريده و القلم ده دايما بيلمس وتر جوايا زي ما حصل معايا في سمعة شريفة و شايف اني الكاتبة محتاجة تزود من انتاجها الادبي ... كان جاي نتيجة ما سبق انا قارئ بيميل اكتر لروايات الجريمة و الرواية التاريخية بالنسبالي بره منطقة الاثارة و التشويق .
المفاجاة بقي اني الكاتبة رهام راضي قدرت تتطلع من فخ الرواية التاريخية التقليدية بالرغم من وجود اجزاء في العمل جايبه نص خطبة السادات لاعلان الثورة و جزء من خطبة عبد الناصرل تاميم قناة السويس ... قدرت من خلال اسرة سيد و علية نعيش الاحداث السياسية من خلال احداث اجتماعية و قدرت انها تكتب رواية سياسية بس رايقة . و اكتر من مره الكاتبة ضحكت عليا كنت اتوقع اني سيرة الاحداث هيمشي في حته لكن تختار طريقة غير تقليدي .
- شخصيات العمل كلها في راي مرسومة بشكل ممتاز بدون غلطان و خصوصا اني في شخصيات في اسرة سيد احنا بدانا معاهم الرحلة من و هما اطفال و مرحلة المراهقة و الشباب و الدارسة و الزواج .
- شخصية نينة أمنة فاقدة البصر صاحبة البصيرة اعتقد دي يتعمل منها روايات حبيت حواراها مع حفيدها فريد و احلامها اللي مش بتنزل الارض دي كانت كريزة في العمل و ان كان فريد فضل يدور علي حلم معين .
- مشهد لف اطفال العمارة في رمضان و عبارة ملبسه علي ملبسة كان ضحك بس و العبارة معلقه معايا و عشان كده ملبسة علي ملبسة الرواية دي حلوة كويسة .
-لو هكلم عن عيوب في العمل فاعتقد هما 2 بس :
اول عيب او يمكن مش عيب هو فكرة التحول الرهيب في شخصية شمعة في التعامل مع عيلة سيد و مع فيفي بسبب خلفة البنات اه انا عارف اني في كتير عندهم تفضيل و خصوصا في زمن الرواية لخلفة الصبيان لكن هتغير الحال للدرجة دي و التغير كمان طال مجدي واثر علي العلاقة مع فيفي .
ثانيا النهاية انا حسيت انها فجاة خلصت و فجاة ابطال كتير في العمل ماتوا بدون ما احس و اعيش ده علي عكس سير احداث العمل من الاول فكان من الافضل في رأي اننا نمهد لده بشكل اكبر و الرواية تكبر شوية عن كده او نبعد عن النهاية اللي فقدنا فيها كل الابطال تقريبا .
- اختيار مكان النهاية للعمل اختيار جيد جدا .
❞هكذا هو الحال دائمًا، يَقل بريقُ الشوارع والأزقة والبيوت شيئًا فشيئًا كلَّما رحل منها أحدُ أبنائها. ❝
❞ السعادات الكُبرى تَظهر غيرَ مكتملة من دون الراحلين ❝
❞وجال بخاطرِها أنه ما الخطأ في أن يُبدل الإنسان آراءَه مع مرور الأيام؟ يَظن بعضُ الناس أن التغيُّر يتعارض مع المصداقية، في حين أن التشبث بالأمور حتى وإن بدأت تَحيد عن الصحيح، هو ضربٌ من الغباء والعناد الذي سيُودي بصاحبه❝
❞ربما سنغض البصرَ عمَّا حدث لنا بالأمس.. وربما سنتغاضَى عن رسائل القدَر في أحلامنا.. أو سندَّعي النسيان.. سنُشوِّه التاريخ، وعبثًا سننتقم من الأيام بمَحوِها.. ولكن في النهاية، ستنتصر الرؤى.. ستظلُّ في تكرار حتى نُفيق ونعترف. حينها سوف نُدرك أننا لم نُشوِّه شيئًا سوى أنفسِنا!❝