🐦🐦عصفورين بحجر

موضوع انك تعمل حاجتين فى وقت واحد.

يعنى تضرب عصفورين بحجر موضوع شيق جدا جدا

ويشعرك بالأنجاز والسعادة والرضا غير انه بيوفر وقت

ويشعرك بروح الفهلوية والشطارة والبراعة.

من ضمن الحاجات دى مثلا انى اسمع حاجات معينة أثناء عملى بالمطبخ خاصة.

مثلا سمعت من اخت مصرية بتعمل ورق العنب والمحاشي لبيتها وهى بتسمع سورة البقرة غيبا وسمعت من اخت سورية انهم مع كل طبخة ممكن تصلى على النبى الالاف المرات والموضوع ده منتشر وليس عمل فردى

تقول لى أخرى اردنية من أصل فلسطيني اسمع سورة الكهف غيبا فى المطبخ عن ظهر قلب لأنى حفظتها جيدا حتى استطيع ترديدها.

وطبعا ناس كتير منهم بيسمعوا قراءن او دروس او غيره.

موضوع علاقة الأكل بالكتاب او بالقراءة دايما كان بيشغل بالى يمكن لأني ربطت بهم بين غذاء الروح وغذاء الجسد او يمكن لأنى بحب التصنيفات يعنى مثلا بحب اجمع كتب السيرة الذاتية واعرفها ثم انتقى منها وده سهل لأن الكتاب من البداية معروف تصنيفه، لكن مثلا بحب اجمع الأكلات التى تتكلم عنها الروايات والكتب واعجبت جدا برواية "كالماء للشيكولاتة" وحاولت اطبق الأكلات فيها لكن كانت

غريبة ومش معروفة البطلة مكسيكية تعانى من ظلم اجتماعى حرمها من الزواج والحب واستعاضت عن ذلك بحب المطبخ والاكلات اللذيذة التى تعطى لها بعض السعادة.

موضوع ربط الطعام بالكتب عندى بدأ من زمان ايام ما كنا نشغل شرايط الكاسيت والراديو، كان عندى دايما فوق الثلاجة تسجيل اسمع منه.

وحتى بعد أن تخلى الناس عن الراديو والكاسيت كنت إلى عهد قريب ابحث عنه ودورت فى مولات ومحلات كتيرة جدا كى اشترى كاسيت جديد صغير وراديو، ولما كنت بسأل عنه كأنى بسأل عن شئ انقرض مع ان كان موجود ساعتها الأبيود لو حد فاكره لكن انا كنت بحب اسمع شرائط بطريقة منهجية ومدروسة إلى حد ما.

من ضمن الحاجات اللى سمعتها وطبعا لا انساها ابدا.

مجموعة قصص الأنبياء طارق سويدان

ومجموعة السيرة النبوية ل طارق سويدان

وايضا مجموعة إعجاز القرآن له

وكانت منتشرة حينها مجموعات راغب السرجاني فى السيرة والتاريخ واظن سمعت مجموعة منهم او مجموعتين.

أيضا سمعت بعض الدروس العلمية فى التفسير خاصة، وفى تربية الأطفال ومحاضرات متنوعة.

بعدها ظهر اللاب توب وطبعا كان عندى ترابيزة كبيرة فى المطبخ على طول عليها اللابتوب وكان المطبخ بباب على الطراز التقليدي.

الظريف فى الموضوع ان كل مجموعة اسمعها او كل كتاب اسمعه بيكون مرتبط بأكلة معينة بعملها حينها.

الدنيا طبعا تطورت والنت واليوتيوب والكتب المسموعة، المطبخ عندى الان مفتوح على الريسبشن على النظام الأمريكي وممكن اسمع اليوتيوب من التليفزيون الآن بوضوح

سمعت كتاب مسلكيات وكتاب الماجريات للكاتب ابراهيم السكران وكتبت ملخصات من كتاب مسلكيات وتعليقات منه وكنت بعمل صينية البطاطس اللذيذة وكتبت عنها

سمعت أيضا دون كيشووت ومش فاكرة كنت بعمل ايه لكن كان على عدةايام.

الآن ومنذ عدة ايام بسمع احلى كتاب سيرة ذاتية سمعته، كله صدق وشفافية وانصاف وثقافة وعلم وسفر واقتصاد وسياسة وبساطة

بجد ملك السيرة الذاتية

"ماذا علمتنى الحياة "

للكاتب ورجل الاقتصاد ودكتور بالجامعة الأمريكية

د. جلال امين

طبعا صدق الأسلوب والشفافية والبلاغة مع البساطة جعلنى ابحث عن كل لقاءات جلال امين على اليوتيوب القريبة والبعيدة واستمع له وأن شاء الله هكتب انطباعتى المتنوعة والثرية تجاه هذة السيرة الذكية.

الكتاب موجود على اليوتيوب جزئين كل جزء 5 ساعات تقريبا وبإصوات مؤثرة وواضحة اتكلم فيه عن طفولته وأسرته وأخواته حتى أصحابه فى المدرسة وسفره ودراسته وجامعته ورسالته ونشاطه السياسى والاجتماعي والجامعي الكتاب شيق ويذكر عدة مراحل حكم الملكية وحكم زعماء مصر فى كل حقبة ويعبر عن رأيه بأدب جم وتواضع وشفافية وموضوعية دون محاباة وطبعا زى ما قلت لكم الكتاب بيكون مرتبط عندى بأكلة او وصفة وده سر بينى وبينكم، احيانا بخترع اكلة او اكلات تتعمل فى اوقات الفراغ (اللى هو مش موجود اصلا) لكى استمع إلى كتبى المفضلة وطبعا لم أجد احلى من الحلويات لأعبر عن امتناني بهذة السيرة الذاتية الصادقة

حلوى البراونيز وكيكة الجيلى بالفراولة والموز

اتفضلوا بالهنا والشفا ولا تنسوا تسمعوا السيرة الذاتية لجلال امين او تشاهدوا لقاءته على اليوتيوب.

الصورة من وحى الواقع 👇👇

اتفضلوا بالهنا والشفا🥮☕🫖

****

#كلماتي١_٢