#سفريات2024

#أيام_الجنة

فيه رواية عادية، فيه رواية تحس إنك البطل فيها مش بطل الرواية خالص، "أيام الجنة" للكاتب"أحمد عبدالمجيد" يمكن أول مرة أحس إني جوة الرواية مش بقرأها

الرواية بطلها"حمادة" اللي بيتولد ف أول سنة 1980 ف كان ثمنيتاني بإمتياز، بنشوف بعيون حمادة الأحداث كلها على مدار الرواية، من أول عصر الإنفتاح وتحرير طابا وباقي سيناء، الإنتفاضة و أهم الأحداث ف القضية الفلسطينية، بنشوف حتى جوة الكواليس زي استقالة المشير أبو غزالة و اغ ت ي ال فرج فودة وغيرهم، دة لأن ببساطة حمادة كان عنده قدرة إنه يحلم بالأحداث المهمة وقت حدوثها

الرواية مش بس بتحكي الاحداث السياسية، لأ...دة فيه قضايا تانية كتير مهمة، زي فكرة إنك تكون الحفيد الوحيد وبعد كدة يجي بعدك أحفاد غيرك يشاركوك ف المحبة والإهتمام والدلع وتأثير دة عليك، كمان نظرة المحيطين لأي حد مغترب وكأنه دخل مغارة علي بابا أيا كانت ظروفه، تأثير دة ع الشخص نفسه، كمان فكرة الغربة نفسها والمجتمع السعودي المقفول للغاية على نفسه ف الفترة دي، التحولات النفسية لجيل أصلا اتحكم عليه بعدم الثبات و جنون كامل من أول حياته

رواية بالنسبة لي أيقونية، مش عارفة عشان لمستني ولا عشان سرد الأحداث كان دقيق، ف طول الوقت بفتكر حاجات أو بستعيد ذكريات بعينها، المهم إني مكنتش حابة تخلص لدرجة إني بدأتها ف نص رمضان وخلصتها من يومين بس لاني كنت بقرأ ببطئ شديد، حتى التعقيب قرأته

شكراً من قلبي يا أستاذ أحمد على كتابتك الدافية...على تأريخك لجيلنا كله بأحلامه ومخاوفه والتغيرات اللي حصلت له ف فترة زمنية قصيرة فعلاً، على جمال السرد والحوارات اللي قلناها بنفسنا ف وقتها، على الدفا اللي حسيته ف كل فصل...الرواية دي غير قابلة للنسيان حقيقي

وأخيراً

تدوم الكتابة الحلوة

#قراءات_حرة

#قراءات_ابريل

#ترشيحات

18/1