🔪اسم العمل : ليلة ظهور القرين

🔪اسم الكاتب : خالد أمين

تعالوا نكمل ملحمة عالم جوثام الشرق من تأليف الكاتب الرائع خالد أمين بعد قراءة "جرائم الغراب السبعة" و"إنهم يأتون ليلا" و"زائر منتصف الليل" و"ذات مرة في الطريق المظلم" والنهاردة معانا "ليلة ظهور القرين" ونرجع تاني إلى ناردين وصلاح اللي تعرفنا عليهم في رواية "إنهم يأتون ليلا".

من الثوابت هنا إننا عارفين إن كل رواية مستقلة بنفسها لكنها في عالم قاتم ومقبض له طابع رعب نفسي دموي ومعوي كمان.

وطبيعي إن كل عمل أو رواية سايبة خط درامي أو اتنين مفتوح على باقي الأعمال.

ومن غير ما نضيع وقت طويل يلا بينا نبدأ المراجعة.

وزي العادة نبدأ مع الانطباع الأخيرة

بعد ما خلصت القراءة لقيت نفسي وعمو إيهاب توفيق يغني جنب وداني ويقول:

"الأيام الحلوة الأيام الحلوة بتعدي في ثواني … الأيام الحلوة ما بترجعش تاني

طعم الحب اتغير … وقت الفرح صغير … أكبر لحظة ود وحب وصدق زمانها قصير

الحلو بيتمرر … والجرح بيتكرر .. نجرح نألم نقسى ونظلم وغلطنا بيتبرر

اللي نحبه بنودعه واللي في إيدنا بنضيعه … واللي ناسينا عايش فينا واللي شارينا بنخدعه"

وبصراحة الأغنية دي ماشية

ويلا بينا ندخل على الانطباع الأول والبداية والافتتاحية..

غلاف قاتم أسود وأحمر وظلال شباك وعنوان قاتم مثل باقي عناوين الروايات السابقة وكلمة الظهر من وجهة نظري مش أحسن حاجة تعبر عن الرواية لكنها كانت كفاية يعني للتعبير عن التصنيف وجانب الرعب والغموض النفسي.

نقدر نقول إن الانطباع الأول كان متعلق أكتر بالكاتب نفسه والتوقع أو الحكاية لالي انا مستنيها ومش متعلق بالغلاف ولا كلمة الغلاف ولو كان الغلاف أوحش من كده ولو كانت كلمة الغلاف مافيهاش حاجة غير التعريف بالكاتب أنا برده كنت دخلت وقرأت.

ومش هخبى عليكم أنا كنت متحمس جدا للقراءة وقلت أكيد الرواية دي هتخلص في جلسة واحدة يعني وفعلا ده اللي حصل.

على طول ندخل على أول صفحات الرواية مع عروسة شابة في بيت الزوجية بتتكلم فيديو كول مع أخوها الصغير وبسبب سقوط التليفون على الأرض بنكتشف وجود جثة تحت السرير.

مع أول صفحة هتركب الحلزونة وتسيب ايديك.

الرواية تسحل يا جماعة وفيها جوانب كتير غامضة ومربكة وعندنا جثث كتير وضحايا أكتر وتقطيع ورعب معوي ودموي وغموض وبحث عن إجابات.

المثير أو اللافت هنا إننا بنتعلق بكل شخصية وبعدين نضحي بيها أو نقتلها والكاتب مستمر في قاعدة التخلص من الأبطال.

طبعا عندنا تويستات كتير والكشف عن الجريمة أو القاتل أو الشرير في الرواية كان فعلا مفاجأة حقيقية.

الرواية تنتمي لعالم صلاح وناردين الصباغ كاتبة الرعب الفضولية وعالم الغموض والتحقيقات الغرائبية.

وتعالوا هنا نتكلم عن الحبكة والنهاية.

يمكن قلنا قبل كده إن الرواية مليانة أحداث والحبكة شريرة جدا في نفس عالم الروطاش أو الشيئ وهنا احنا بنتكلم عن تيمة السيطرة والتحكم والتلصص.

عندنا تويست حلو في نهاية الرواية وخط مفتوح على مركب الشر المطلق وعندنا ظهور لبعض الشخصيات الحلوة جدا واللي كنت متوقع لها مستقبل حلو في عالم الكاتب الروائي لكن يلا الله يرحمهم بقى.

وهنا مكن نتكلم عن الشخصيات في الرواية

عندنا أبطال أو شخصيات رئيسية زي ناردين الصباغ وصلاح لكن التركيز كان على الشخصيات الجانبية المحركة الأساسية في حبكة وأحداث الرواية.

يمكن الشخصيات الرئيسية محصلش فيها تطور كبير لكنها تعتبر مغامرة عملت على زيادة لرابط ما بين ناردين وصلاح.

عندنا جزء مؤثر مرتبط بالشخصيات والدوافع النفسية وعندنا شق بسيط جدا شاعري ومش رومانسي.

طبعا للمرة اللي مش عارف كام لازم نتكلم عن خيال الكاتب والثقافة بتاعته وقدرته على وضع الرعب والتوتر في ذهن القارئ من خلال اللفظ والكلمة والجملة.

وتعالوا هنا نتكلم عن اللغة في الرواية.

طبعا العمل بالكامل بالعربية الفصحى وعندنا وصف بطبيعة الحال عبقري وحوار قوي جدا ومكثف في ولازم ناخد بالنا هنا إن مستوى الكاتب اللغوي فيه تقدم كبير عن الرواية السابقة.

طبعا ممكن تستخرج شوية اقتباسات كده عنب أحمر من غير بزر زي مثلا.

"ابتسم وتألق يا صديقي، ولا تنظر للسواد أسفل عينيك وهذا الشعور السقيم بالخمول، الحياة لا تزال رائعة، الحروب لا تزال تدمر البلدان، والشركات لا تزال تنهب الجميع، والحب يتحول لعذاب إغريقي في نهاية المطاف، ولكن الحياة لا تزال رائعة."

وهنا لازم نستعرض الفكرة والغرض والهدف

أجواء الرواية هي الرعب والتركيز على فكرة كشف الغموض مش عارف ليه حسيت وكأني بتفرج على فيلم رعب هو خليط ما بين أفلام البيوت المسكونة وأفلام الوحوش والغيلان.

عندنا أفكار كتير في الرواية مستترة شوية ومش واضحة لكن من الواضح إن الكاتب كان مركز على المغامرة والرعب دون التركيز على الفكرة.

وأخيرا خلونا نتكلم عن الخلاصة

النهاية كانت سريعة أوي وخلصت في كام صفحة وكانت مرضية ويمكن مستعجلة شوية.

والخلاصة إن الرواية حلوة أوي وقابضة جدا وحسيت معاها وكأني قصيت سهرة مع فيلم رعب حلو.

الريفيو القادم هو الأخير في عالم "جوثام الشرق" قبل معرض 2025 ويكون مع رواية "قريبا سيحل الظلام" إن شاء الله.

#أحمدمجدي