❞ لقد سقطت الأمطار بعد أن جف الزرع، ❝

الجملة ديه قابلتنى فى النهايات بس خليتنى افكر شوية فيها وشفت أن ممكن كل شخص ياخدها بمعنى حسب موده ومزاجه 😉

ناس هتقولك فعلا " ما هو بعد العيد ما يتفتلش الكحك" 😀 اللى هو بعد ايه يا أستاذ ده الزرع جف واللى كان كان

وناس تانية هتقولك … حلو بدل لسه فيه أمطار 🌧️ يبقى ايه المانع نبدأ من أول وجديد ونزرع 🍃من تانى على نضيف 😁

قولى كده أنت هتاخدها ازاى 😉

بس فى حالة الرواية اللى كنت بقرأها #المستحيل لـ #مصطفى_محمود ياترى الابطال شايفين أى معنى فى الاتنين 🤔

رواية شخصياتها مضطربة مش عارفين عايزين ايه

بيروحوا للمستحيل يخوضوا فيه

وبعدين يقولوا مش لاعبين

احترت معاهم كتير

مش عارفة اتعاطف ولا اشمت فيهم ولا ايه

كلهم محتاجين علاج يمشوا عليه

ويقعدوا مع نفسهم يحددوا اولوياتهم ايه

قبل ما يدخلوا بضمير فى المستحيل وبعدين

يتفاجأوا بأنهم محتاسين ومكانش ينفع ندخل برجلينا الشمال بقى ( لأن أفعالهم مهببة بهباب 😄)

شخصيات فعلا تايهة ، ضايعة وفى نفس الوقت عايزة تتمرد ( مش هتعرف برضه تتعاطف ولا تعمل ايه ) 😄

بيدورا على اللى مش معاهم ويمنوا نفسهم به وهما عارفين أنه " مستحيل "

يدوا لنفسهم مبررات لأخطائهم اللى غرقت الصفحات

ويرجعوا تانى فى الكلام ويقولك بلاش خراب.

حيرتونى معاكم وحسيتكم اقرب لمسلسلات الأيام ديه… اللى هو تعكوا العكة وتقولوا مش قاصدين🤦🏼‍♀️ وهنعمل ايه ما احنا محرومين ومحتاجين …

( لسه برضه مش عارفة اتعاطف ولا اقولهم انتوا السبب فى اللى انتوا فيه🤦🏼‍♀️)

هيفضلوا تايهين لحد ما يتوهوا القراء معاهم 😄

الرواية استغربتها على كتابات مصطفى محمود اللى متعودة عليها شوية … ممكن يبقى برضه فيها جزء فلسفى وهى حيرة الانسان فى أنه ياخد اى قرار

وازاى خطوة تاخدها زمان ممكن تأثر عليك سنين قدام ومتبقاش عارف تتخلص منها ولا تكمل فيها وأمرك لله … فى أمور فى حياتنا ينفع نزرع من اول وجديد لكن فيه حالات ارضى بزرعك اللى فضلت تربى فيه وجيبله سماد جديد 😄 وإن شاء الله ربنا يبارك فيه ويطرح من جديد زرع يملى عليك الغيط 😁

طيب حبيت الرواية ولا ايه 🤔⁉️

هقولكم حسيت بإيه حسيت بالتخبط والحيرة وانى بقيت ضايعة وتايهة 😄 فعلا مش عارفة احدد حبيتها ولا ماحبتهاش بس هى الدنيا ولازم تتعاش على رأى خالد سليم 😉

( عيشها بالطريقة اللى تبقى مرتاح فيها بس المهم ماتأذيش غيرك بها ) بس كده 🙋‍♀️

نقطة أخيرة ورزقى على الله 😄👇🏻👇🏻

فى اعتقادى وممكن الاقى هجوم فظيع عليا بعد الجملة ديه 😉

أن الرواية ديه لو اللى مش كاتبها مصطفى محمود الله يرحمه وكاتبها شخص من أيامنا ديه كان هيتقال كتير كتير على الفكرة والحوار وطريقة عرضهم 😁

#مكتبة_دنيا

#قراءات_٢٠٢٤