الجزء الثاني من مغامرات بدرية وأم حنان ( الزائر)
أقصر من الجزء الأول، مغامرة أخف دارت كلها في شقة بدرية.
في يوم مش هيتكرر كتير بسبب سفر حمدي لشغل في قويسنا وسفر أبو وليد لعزاء والدته بصحبة وليد ابنه اللي شبط فيه، طلعت أم حنان تبات مع بدرية بناء على طلب سي حمدي اللي بيخاف على مراته وعايزها تتونس بصاحبتها وجارتها في غيابه، وأبو وليد وافق.
وسافر الرجلان والستات قضوها قدام فيلم السهرة وبقهم مابطلش أكل ولا شرب
من قزقزة لب وأكل فاكهة وساندويتشات وشرب سحلب وحلبة
ليلة يعني 😅😅
بس الليلة ماعدتش بسلام مع أنها كانت حلوة أوي واتمنيت يبقى لي صاحبة بالقرب ده، ناكل ودان بعض كدة زي ما كانوا سوا. هو صحيح يعني يا سبحان مغير الأحوال والمحبة اللي كبرت بينهم بعد وصلة معتبرة من الردح بعد أسبوع واحد من جواز بدرية من حمدي وكانت تسبقها في العمارة أم حنان اللي كانت تكبرها بخمس سنوات واتجوزت قبلها بنفس عدد السنين.
وبعدها لك أنت كمان يا ست أم منى ما تلايميها بقى 🤦
بس دلوقتي برضه أنا فضولي سايقني أعرف الزائر أخد الطشت النحاس التقيل إزاي في الليلة الممطرة دي ؟! 😁