الكتاب الثاني من عالم ورد الحكاوي، مع بداية القراءة هتلاحظ إن الكاتبة بتدي نبذة بسيطة عن الجزء الأول بحيث القارئ يكون عارف الخطوط العريضة لحدوتة العدد الأول في حال مكانش قاريها، مع وضع في الاعتبار إن العدد التاني أحداثه مش معتمدة علي الأول خالص ممكن تقراه لوحده عادي .. السلسلة ليها طبع خاص تقدر تميزه لما تقرا اي عدد من الاتنين، مثلاً اللغة مكتوبة بدقة مناسبة لعصر الأحداث و فنفس الوقت فيها رشاقة متبانش إنها قديمة، الشخصيات كمان بارزة كل شخصية ليها بصمة واضحة سواء في طريقة التفكير او اسلوب الرد .. الأحداث في العدد ده وتيرتها سريعة و جذابة و هتلاقي نفسك بتتفاعل معاها، و مع حجم العدد الصغير ممكن تلاقي نفسك قريت نصها فجلسة واحدة .. لو عندي مشكلة فهتكون مع النهاية حسيت فيها استعجال شوية و مخدتش حقها و كمان فيه جزء شخصية لم تكمل سرده كنوع من التشويق و امتداد للعدد الثالث لكن كانت مستفزة ليا كقارئ لرغبتي فمعرفة ما حدث .. العدد حلو و الحدوتة جميلة و الكتاب مناسب لجو الصيف ممكن يتقري فطريقك للمصيف او علي الشط هيكون رفيق ملائم جداً