"عن رواية مواليد حديقة الحيوان لأشرف العشماوي"

❞شعرت طوال الوقت بأنني أعيش فاصلًا زمنيًّا بين الحزن والسعادة، ولا أستطيع ترجيح الكفة بينهما جيدًا.❝

شعور إنك لا قادر تفرح ولا عدت نتحمل الحزن، أو فكرة الوقوف في المنتصف نفسها حاجة مؤذية أوي.

❞نتراهن دومًا على إضحاك بعضنا في المآتم، لكني اليوم حزين ولن أشاركهم اللعبة.❝

عدم احترام الأحزان أو هيبة الموت بقى شيء شبه معتاد عند ضعاف الإيمان، بس.. حتى يمسهم الأمر!

❞كأن كل شيء في حياتنا لا بد وأن يكون مسببًا، مع أن أجمل الأشياء هي التي تأتي عفوية.❝

بحس أكتر ناس مبسوطة في الدنيا هم اللي ضاربينها صرمة وسايبينهم من وجع الدماغ بتاع المجتمع، المجانين في نعيم فعلا.

❞تتأرجح الحقيقة فوق أحبال الظنون.❝

مش دايمًا الحقيقة واضحة ومش دايمًا الظن سوء، لكن للأسف الصور دايمًا خداعة.

❞لا قيمة لحديث النفس بينما الروح مخنوقة لا تستطيع أن تجد لحريتها سبيلًا.❝

أوقات كتير بيبقى الصمت أبلغ تعبير من أيام كلام ممكن يتقال، وده بيحصل لما الواحد يوصل لأعلى مراحل الاختناق.. من جواه.

**********************

‏الاقتباسات اللي فاتت علمت معايا جامد وكانت بالنسبالي هي الرسائل المستخلصة من الرواية وعشان كده حبيت اتكلم عنها..

العمل ده هو أولى قراءاتي للكاتب، مش هنكر إن لغته عظيمة وأسلوبه مميز وعنده قدرة على جذب قارئة نهمة زيي عشان تقرأ العمل لنهايته رغم الحاجات اللي مضايقاها فيه..

بعيدًا عن السرد المبهر والصياغة القوية والحبكة المحكمة والاختيار المناسب لعامية الحوار وموازنته مع السرد، ضايقني كذا حاجة وأنا بقرأ..

في القصة الاولى "كابينة لا ترى البحر" والقصة التالتة "مواليد حديقة الحيوان"؛ مش عارفة ليه بين السطور كان في ألفاظ أنا شخصيًا لم أستسِغها؛ سواء الحديث عن جسد المرأة أو عن الأمور الجنسية، الحقيقة ده مش اول عمل أقابل فيه الموضوع ده، وأغلب اللي بقرألهم بيكونوا كتاب ليهم اسمهم ومكانتهم، فمش لاقية سبب مقنع لدس الأمور دي بين السطور بسبب وبدون سبب، احنا حتى لو مضطرين لذكرها ممكن نذكرها بشكل نراعي فيه حياء القراء، خصوصًا لو كانوا مراهقين!

في القصة التانية "مزرعة الخنازير"، محبتش أبدًا فكرة البطل المسيحي اللي سبحان الله لما بيسمع خطبة جمعة بتكون عن الجهاد عشان يبان إن الإسلام انتشر بحد السيف خلافًا للحقيقة، أو بتكون عن حرمة أكل الخنازير وإزاي الشيخ بيزعق عشان يقول إنها حرام أكلها أو الانتفاع بشيء منها أو أو أو، بدل مثلا ما يجيب أسباب ربنا حرم عشانها ده، وتكرار الأمثلة دي بينفر البطل من الدين وبيخليه مقتنع إن دي كلها مظاهر تدين مش أخلاق ملتزمين، ومش بس كده؛ تم تشويه صورة المتدينين وإظهارهم على إنهم مستبيحين لدماء من خالفهم، مع إن المعروف إن السنيين ماشيين على هدي النبي صلى الله عليه وسلم اللي نزل عليه كلام الله "لكم دينكم ولي دين"، وماشيين بمبدأ "لأ ضرر ولا ضرار"!

كمان العمل خد عنوان النوڤيلا التالتة، وغلاف يعبر عن النوڤيلا الأولى وتجاهل النوڤيلا التانية مع إنها كانت أقواهم، ورغم عدم حبي للسياسة ولا القراءة فيها لكن النوڤيلا كانت مكتوبة بحرفية شدتني وأجبرتني أعجب بيها.

دي حاجات من وجهة نظري بوظت كتير في العمل رغم قوته، تختلف أو تتفق معايا، في النهاية كلنا قرأنا العمل بس طلعنا بوجهات نظر مختلفة♥️

#خلاصتها_في_اقتباساتها.

#زينب_إسماعيل.