كتب التاريخ كتيرة
ولو عاوز تعرف عن شخصية معينة كل الى عليك انك هتعمل بحث ويطلع لك كتاب ما
بيقولك تاريخ الشخصية
اتولدت امتى وفين واتعلمت فين وماتت امتى
دة كتب التاريخ العادية
ولو انت غاوى روايات تاريخية
ف هتلاقى رواية بتتكلم عن الشخص دة ف حياته بشكل سردى غالبا
الله
طب ايه الجديد الى بيقدمه عمر طاهر فى كتابه؟؟
وليه اسمه صنايعية مصر؟؟
اقولك انا
عمر طاهر ببساطة اختار اكتر من 30 شخصية
من الشخصيات المؤثرة فى تاريخ مصر المحروسة
بس بدل م يرغى عن كل شخصية عملت وسوت واتولدت وماتت
لا
هوة اختار التركيز على الحدث الاهم ف حياتها
ف كانت النتيجة كبسولة تاريخية مركزة
عن الصنايعية
فصوله متنوعة بين صنايعية ...الطب و الهندسة
صنايعية الوزارة و المحافظات ...
صنايعية الامن و الصحة و التأمينات الاجتماعية....
صنايعية البيزنس من شاى و شيكولاتة و زجاج و اتوبيسات خاصة و شرايط الكاسيت والفيديو ... بناة المساجد و برج القاهرة و الحرم النبوى....
صنايعية الشعر و الغناء و الطرب و الموسيقى و الالحان و الاخراج و التمثيل ....(تقسمة الفصول منقولة حرفيا من ريفيو ع الجود ريدز ب اسم Ramy Gomaa )
ف كانت النتيجة
معلومات مركزة جدا
عن حدث معين بلو الشخصية دى
او الحدث الاهم الى خلاها بقت جزء من تاريخنا المصرى
كتاب ممتع
لغة الكاتب واسلوبه هيحسسك انكم قاعدين سوا فى جلسة دردشة
والكلام جايب بعضه
عن الشبروايشى وحكاية الكولونيا
عن ياسين ولمبة نمرة 5 ومصنع الكوبايات
عن وجيه اباظة صنايعى المحافظات
عن محمد فوزى صنايعى الاسطوانات
قائمة كبيرة ومميزة
ومختارة بعناية فائقة
ف كان صنايعية مصر من صانع السعادة
كتاب يستاهل كل جنيه
ويستحق جدا اضافته لمكتبتك الشخصية
لانك هترجع له كتير