#سفريات2024

#سيدة_القرفة

انا من عشاق الروايات اللي بتتكلم عن الأكل، كمان متابعة جداً للكاتبة "رحمة ضياء" من أول "النقشبندي" وكنت متشوقة جداً للعمل الجديد، كانت الرحلة المرة دي مع "سيدة القرفة" الصادرة عن "دار الشروق" في قراءة جماعية جديدة مع الرفاق MoniCa Abdel-malak Ahmed Mohamed Esraa Adel Heba Elzahhar Randa ElSayed Rahel KhairZad Fedaa El Rasole Dina Mamdouh

الرواية بالنسبة لي مقسومة جزئين، الجزء الأول بدا بمشهد قوي جداً واختفاء الشيف توفيق ومحاولات الجميع بقيادة بنته الوحيدة "ميمي" للعثور عليه، للأسف بيلاقوه م ق ت و ل ومرمي ف النيل في جريمة غامضة ل شيف معروف إن حياته هادية ومحبيه كتير، بس يمكن الناس مش دايماً زي م احنا بنشوفهم من برة مهما كانت علاقتنا بيهم

بنشوف مع ميمي علاقتها ب والدها، خروج مامتها من حياتهم بشكل غريب ومفاجئ ومحاولة الأب للعب دور الأب والأم واللي للأسف مكنش بالسهولة الكافيه لا عليه ولا على ميمي، اللي كبرت وجواها إمتنان كبير جداً ل باباها و غضب كبير جداً على مامتها، كمان الكاتبة برتكز على علاقة ميمي و توفيق بالمطيخ والتوابل خاصة سيدة التوابل من وجهة نظر الأب "القرفة"، اللي بتدور حواليها أغلب الأحداث

بنشوف مع ميمي مفاجآت عن علاقات الأب، مع ظهور الأم بتبتدي الدنيا تتعقد ومشاعر ميمي تتلخبط ما بين رغبتها الشديدة ف إنها تحس بوجود مامتها و غضبها الشديد برضة من اختفائها طول السنين دي، زاد اللخبطة دي ظهور "نادية" الأخت غير الشقيقة واللي قدرت بحيويتها تغير نظرة ميمي لحاجات كتير جداً وتغير مسار حياتها بالكامل

بنشوف على مدار الرواية وبشكل مركز جداً قصة توفيق من اولها لحد ظروف ق ت ل ه بالطريقة الغريبة دي، بنشوف تحولات شخصية ميمي ونظرتها للحياة وعلاقتها ب امها واختها

الجزء الثاني كان عجيب بصراحة، هنا هعمل زي أحمد و هطلب من اللي مقرأش الرواية يفوت اللي هقوله لحد الإقتباسات

الجزء الثاني ميمي كانت بتحاول توصل لقاتل أبوها، بس الصدف كانت كتييير جداً اكتر من اللازم وأكتر من اللي ممكن أستوعبه، كمان أسلوب التقرير او التعليم زي م هبة قالت كان غالب على الفصل الأخير اللي كانت ممكن تتكتب بشكل أحسن شويتين تلاتة من كدة، كمان م استوعبتش فكرة سفر ميمي مع أحمد بصراحة لوحدهم، التربية المقفولة دي واللي اصلاً مكنش ليها صحاب إزاي هتعمل دة ف يوم وليلة؟؟؟ فكرة الجواز وهيا صغيرة قوي كدة مش مقبولة ف زمننا دة، الناس بتعرف بعضها شوية والخوف من الفشل بيحرك أغلبنا، مشهد الختام مع احمد مستهلك جداً وميمي برسمة الشخصية مش هتقدر تبقى بالقوة دي ف لحظة

خلصت حرق كدة 😁

ارجع للرواية

الرواية مكتوبة حلو فعلاً من اول لاخر صفحة، رغم التحفظات ولكنها قدرت تشدني لالاخر عشان اكملها، عجبني جدا علاقة ميمي ب نادية، التصوير السينمائي لمشاهد بعينها، اللغة حلوة فعلاً وفيه مشاهد واقتباسات بتوصفني انا شخصياً، النهاية عجبتني رغم تحفظي على طريقة الكتابة

من الرواية

*للألم قدرة هائلة على إعادة تشكيلنا

*وتعلمت من الحياة البقية. علمتني بأقسى طريقة ممكنة، ولكن أليست هذه طريقتها في إعطائنا الدروس؟

*في عالم اليوم، على الفتاة أن تتحلى بالشجاعة والإرادة لتغير حياتها بنفسها دون انتظار أحد ليخوض لها معاركها، فالفارس أيضًا لديه معاركه مع الحياة. وعلى حياتهما معًا أن تشكل استراحة محاربيْن، حيث يضع كل منهما سلاحه جانبًا،

* يأتي الصباح ليذكرنا أن الحياة يمكنها دومًا أن تبدأ من جديد، أن تمنحنا فرصة ثانية لنكون نسخة أفضل من أنفسنا، لا يهم أن نكون فيها الغالبين، المهم ألا نستسلم أو نتوقف عن المحاولة.

في المجمل، الرواية عجبتني رغم التحفظات، هستنى جديد الكاتبة بنفس شغف انتظاري ل "سيدة القرفة"

#قراءات_حرة

#قراءات_مايو

#قراءة_جماعية

21/1