انا بحب اسمع راب مصري من ٢٠١٣ تقريبا بدأت بالجوكر وبعدها دوامة اليوتيوب خليتني اسمع كذا حد واعرف يعني ايه diss track وكنت ديما من جمهور الجوكر والفريق بتاعه دوشة وعلي الشاعر وبعدها دخلت ثانوي واكتشفت SoundCloud وبدأت رحلتي مع ابيوسف اللي عرفته من تراكات كانت كلماتها غريبة جدا وجذابة بالنسبالي
في الفترة دي كنت بسمع الكلام دة بيني وبين نفسي عشان الكلام دة كله كان فعلا underground وكمان مش محبوب او مقبول من شريحة كبيرة وكان وبيقابل سخرية ، لحد ما الدنيا بدأت تطور ومع شهرة مغنيين الراب وظهورهم على الميديا بدأ الناس تسمعهم بشكل أوسع وبدأت الموجة الجديدة
سيد عبدالحميد بقى في الكتاب دة تقريبا لخص ٩٠ ٪ من ١٢ سنة انا عيشتها بسمع راب وشاهد على المجال دة وتطوره لدرجة اني سعيد جدا جدا إن عشت يوم شوفت فيه كتاب بيتكتب عن الشباب دي لاني شايفهم من البداية من أول أغنية وانا متابع ❤️
الكتاب بيبدأ بمقدمة عظيمة وبعدها بتتقسم الفصول عن تجارب رابرز معينين وفي النص في هوامش ودردشة وكانت من امتع الحاجات هي الدردشة مع راشد ( producer)
كل فصل كان بيعرف الرابر وبيناقش محطات مهمة في حياته الفنية وبيحلل دوافعه النفسية والحاجات اللي أثرت عليه وعلى فنه وازاي قدر كل فنان يتعامل مع الأوقات الصعبة ولحظات التوقف والضعف
من امتع الحاجات اللي في الكتاب واللي لازم أشير لها اختيار كلمات الاغاني ، الكتاب مليان اقتباسات من اغاني الرابر والممتع أن سيد كان بيخلص مثلا تحليل او توضيح نقطة معينة ويثبتها بجمل من اغنية للرابر وتبدأ تربط فعلا معنى الكلام وتحس به لاني وانا بقرا كنت بسمع صوتهم في وداني
في بعض الناس ممكن تشوف أنه مين دول عشان نعمل عنهم كتاب ، لكن أنا مختلف تماما لأن دة كتاب مهم جدا بعد ١٠٠ سنة قدام فيه ناس هتقرأ وتستخدمه مرجع زي ما دلوقتي بنقرأ عن تاريخ حميد الشاعري اللي اعتبروه اسفاف وقت ظهوره و دة كان باين جدا في الجزء بتاع ( رقابة ونقابة )
في النهاية زي ما سيد قال أن الكتاب دة مش عن الراب بس هو عن كل الناس اللي بتحاول تنجح من غير ما تغير نفسها ودة اللي فعلا الرابرز عملوه هما تقريبا غيروا الذوق العام لشريحة كبيرة جدا جدا من الناس وقدروا يتصدروا المشهد الموسيقي والاعلانات ودة بيخلي حد زي شاهد على الموضوع من البداية سعيد جدا ويخليني بدل سهولة لما حد يسأل عن ايه هو الراب المصري دة ...أقوله خد اقرأ الكتاب وهتفهم لانه كمان هيزود من ثقافتك كمتابع للمشهد الموسيقي عموما لانه مليان شرح لمصطلحات وتعريف الفرق بين انواع زي rap و trap
حقيقي شكرا لسيد على المجهود الباين والمعلومات والبحث لاني اتصدمت واحنا بنتكلم أنه مش سميع راب من زمان ...يعني هو غالبا جمع معلومات انا حصلتها على مدار ١٢ سنة في ٣ او اربع سنين 😂❤️❤️