طبعا دكتور مصطفي محمود رحمه الله أديب ومفكر عظيم وهذا لا خلاف فيه.. والكتاب فعلا لا يخلو من إفادة.

مجموعة من المقالات التي يناقش بها قضايا او يروي قصص من بريد القراء ويبدي فيها رأيه.. او حتي مجرد تأملات..

تحدث عن النهم والشره اللي بيصيب الإنسان والطبيعة الاستهلاكية المتفشية في المجتمع الحديث..

عن كون الإنسان لا يدرك الأشياء إلا بفناءها..

عن الحب والكراهية والحقد والطمع والحسد. تحدث عن ارادة الإنسان وكيف أنه مخير وكيف أنه هو صاحب قراره سواء كان خيرا ام شرا وليس مجبر تحت اي ظرف..

تحدث عن الحب الأول والحب الأخير.. وعن الحرية والمسؤولية.. وغيرها من الموضوعات المفيدة.

هنا اسمحولي أتكلم عن الجانب الهزلي في رأيي في الكتاب 😀

ألا وهو حديثه عن المرأة... والسؤال اللي كان بيراودني وأنا بقرأ كلامه عن الجنس اللطيف علي حد قوله هو "ليه كدة؟ 😂"..

يعني المرأة هي الخاينة والراجل الضحية وماذكرش العكس عشان ينفي التعميم..

المرأة فضيلة وبعد شوية رذيلة..

المرأة أحسنلها البيت والمطبخ وان مايكونش عندها فراغ.. وبعدين ازاي المرأة لازم تواكب عصر التفكير ولازم تبقى مثقفة ومتحررة.. وبعدين ينتقدها لنفس السبب! 😀

مقال كامل قال اسمحولي اشتمكو فيه.. وبعدين قال جنس لطيف نموت من غيره ونموت بيه! 😂

والمقال اللي حقيقي كان مستفز "أغلى ما أملك".. واللي فيه ان المرأة الجدية والمحترمة والمؤدبة الناجحة ماهي في داخلها الا امرأة تتوق لكلمات الرجل اللي تخدش احترامها وجديتها.. يعني كل امرأة صارمة في تعاملاتها هيا في الأصل بتتحايل على راجل يقتحم حياتها بكل صفاقة لأنها عايزة تحس بأنوثتها! 🙄

ومقال تاني عن أد ايه الراجل اما بيقرر يستقر بيكون عبد لرغبات الأسرة ( which is maybe true )

بس طب ما الست كمان بيطلع عينها 😳.. وان ياعيني الراجل مصيره ف الاخر هايتخان من الست ناكرة الجميل اللي بتجري ورا راحتها بس..

ليه طيب 😂 يعني ما الكلام في الفكر والأدب جميل.. مش عارفة ليه معظم أدباء ومفكرين الفترة دي بيحبوا المرأة ويلعنوها في نفس الوقت ليه الازدواجية؟

انا بس كل اعتراضي انه مش محدد هوا بيكره النساء ولا بيحبهم وانهم حلوين ولا وحشين.. بجد ما كنتش قادرة أحدد ولذلك الموضوع كان مضحك بالنسبة لي 😀😀

كل الاحترام طبعا للرأي والرأي الآخر 😃👍

ولكن رجاء شخصي للأدباء والكتاب والمفكرين.. سيبوا المرأة في حالها 🤌😂