بتتغير ملامحي كتير
وتتعلم عنيا ازاي
تتحجر
وتتاخر دموعي ساعات
عن المواعيد
وباتعلم
اسيب الصمت
يسكنني
مانيش محترفة ابتسامات
مانيش متفاءلة بطبيعتي
ماليش في الاحتفاء بالذات
ومحتاجة
اللي يحضنني
مبعرفشي اني اتجمل
قلام الكحل كرهاني
صوابع الروج مخصماني
انا مش وحشة يا اخوانا
مرايتي وبس عرفاني
والعاشق هيفهمني
أنا غجرية جوايا
بترقص حافية
فوق الشوك
بتتلقن
دروس الشوق
بوحشية
وببساطة
بتتمرد على المزيكا
والاحلام
على الايام
على رغبتها
في الاحزان
وبتحاول تكون فكرة
وبتفاجئ
بطفل بيحبي جوايا
ميعرفشي من الدنيا
غير الألوان
بيتواصل بصرخاته
في وسط الناس
ميعرفشي عن المنطق
غير الاحساس
وبيصدق
وبيآمن
من لمسة
بتتغير ملامحي كتير
في لحظة ما بين بكا وحبور
ما بين ابتسام وكلام
وبين صمت ودموع وآلام
ما بين انسان لقى نفسه
وبين الحتة اللي نقصاني
مشاركة من إبراهيم عادل
، من كتاب
