– «قومى قبل جوزك من النوم بنص ساعة كده اغسلي وشك وسنانك وسرحي شعرك وحطي ميك اب خفيف.. بلاش تسيبي نفسك شبه الغوريلَّا».

‫ الجُملتين دول بيوصّلوا للست في بداية الكلام إن هذا الشخص اللي نايم جنبها أهم منها.. يعني ما ينفعش حتى إنها تصحى من النوم في نفس الوقت اللي هو يصحى فيه.. إزاي يعني؟ ليه؟ وهل تجرؤ تعمل كده؟ مش بس كده.. ده من أهميته، لازم يصحى الصبح يلاقي في وشه عروسة.. على سِنجة عشرة.. مش باين عليها أي أثر لنوم أو تعب أو سهر.. إنما هو يصحى عادي (لا مؤاخذة بعماصه وريحة عرقه ولخبطة شعره).. وهي مطلوب منها تشوف ده وترحّب بيه وتضحك في وشه.. بيقولوا لها بلاش تسيبي نفسك شبه الغوريلَّا.. لكن مافيش أي مشكلة هو يبقى شبه إيه؟!