مراجعات رواية سرداب قصر البارون

في تجربة اولي لقلم سمعت عنه كتير

التجربة كانت سيئة جدا و اقل من المتوقع بكتير جدا و الحبكة ضعيفة جدا و فيها ثغرات

لكن بالرغم من كده و هقول اسبابي في كده الا اني الاسلوب و اللغة كانت سلسة

فكرة الرواية اعتقد انها كانت تبقي اقرب للتناول من كاتب شاب لسه بيشق طريقه في عالم الكتابه

من هنا بقي هيبقي في حرق للاحداث

* تحذير بالحرق*

* المفروض اني تصنيف العمل رعب او حتي ماورائيات و غموض انا لحد 30% من العمل مفيش اي حاجه ليها علاقة بالرعب ولا غموض مجرد تعريف بالابطال و اعتقد دي نسبة كبيرة جدا من العمل كان مفروض اعيش فيها في غموض عشان اكمل العمل .

*في اول فصل باسم اسراء كارول و ماريز كانوا عندها في البيت ماريز سابت كارول تكمل اكل و طلبت اوبر تروح بيتها فسبحان الله في الفصل اللي بعده يكتب اني ماريز مروحة من بيت اسراء و هي سايقة عربيتها طب ازاي !!

* في تالت فصل يتسمي باسم حازم جمال رامي بيحاول يطلع وراء ماريز فقوة اسراء بترجعه و يتخبط في الباب المفروض و المنطقي انه اتخبط بظهره لانه كان بيحاول بيطلع و بيجري بوجهه ازاي اما يتخبط في الباب يمسك ركبته و تبقي هي المتاثرة من الخبطة !

* بنكمل الاحداث و بيذكر اني رامي وضع جبيرة علي رجله و ماسك عكاز طب مش هو الاصابة كانت في ركبته ازاي بقت اسفل الركبة!

* برده بنكمل الاحداث و بترا بتروح لبيت رامي بسبب دعوة دكتور اسحاق و رامي بيطلع يستقبلها و هو ماسك العكاز ثم بيقوم معاها للمطبخ يعمله مشروبات و بيطلع ماسك الصينية طب العكاز راح فين و شايل الصنية و هو بيتعكز ازاي برده المشهد ده غير مقبول بالنسبالي تماما .

* ثم علي فترات في باقي العمل رامي بيفتكر اني رجله بتوجعه .

* في فصل مسمي باسم خالد بترا بتتطلب منهم انهم يخلصوا تصوير و يتصلوا بيها طب ما احنا عارفين اني مفيش اتصال في مكتبها من اول زياره للقصر !!

* حاجه كمان غريبة جدا المفروض اني اسراء اللي كان بيحصل معاها ده جزء منه بسبب السحر الاسود اللي شربته طب ده هي اتعالجت منه ازاي لاني المفروض هي كانت تحت تاثيره و كان فعال كمان.

* اختيار البارون لنزار غير واضح .

* فكره السحر الاسود انه جاي من الاجانب طب ازاي ؟

* فكرة بقي اني خالد الدكتور الناجح مش لاقي يعيش و بيصرف اللي جاي عشان يفضل في مستوي معين مش منطقية .

* بترا اه مديرة القصر انما انها عرفت تداري التكسير في الحيط اوفر اووي .

* انتقام خالد عشان ابوه اوفر لانه ازاي دكتور ناجح زيه هيدمر مستقبله.

* سلاح جريمة قتل صباح غير منطقي هو التليفون استحمل ازاي انه صباح تضربه بيه لحد ما تموت و مش بس استحمل ازاي هو ازاي خالد عرف يحكم قبضة ايده عليه عشان يبقي في قوة ضربات كفاية لموت صباح !!

* تسمية مجدر الهيروين بتشارلي كان الافضل يتفسر معني الاسم في اول مره لاني وقفت قراءة و روحت ابحث ايه تشارلي ده .

تطبيق فاشل

اول ملاحظة عن القصة.. مروى اسلبها ثابت. تروي القصة كانّها خارج عن تصنيفها الرعب و مع تقدم الحوادث تظهر الإثارة في الفزع المزعوم و تكر سلسة حلقات المجفلة. فكرة اخرى انها تذكر تحديثات العصرية و تبحث عن موضيع و تواريخ لإغراء القراء بالمؤتمرات و الاعدادت الثقافية و لأكرهه في روياتها هي ان دوماً الحوار بين شخصيات القصة تكتبها في لغة عامة.. و مشكلتي ليس بالهجة المصرية. أنا أفهمها و استسهلها انما عندما تكتب القصة خارج لغة عربية اصلية مهما كانت اللهجة و المقصود تفقد الكثير من قيمتها و خاصةً بنسبة لعشاق اللغة العربية. يفترض ان الهدف خلف ذلك هو جذب منتجين السينمائية و تيسير امورهم بتحويل الرواية الى فيلم… مع ذلك اعكف على استمرار قراءة شغلها لان باختصار قصصها مثيرة لحدٍ ما…

سرداب قصر البارون

رعب

قراءات ابجد

مارس ٢٠٢٤

تجربتي مع مروي جوهر مع نبؤة قصر السلطان اديتني حماس ان الكتاب دا هيكون مستواه اعلي وافضل ..

لكن الحقيقه ان الرواية كأنها تجربه جديده للكاتبه

في اجزاء كتير ف الاحداث كان ممكن يطلع منها قصه حلوة لكن عدت مرور الكرام

الصراعات ، عادية مكانش علي قد اللي منتظراه من الروايه

الحبكه النهائيه جت غير متوقعه لكن اسلوب عرضها مفتعل

واخطاء ف بعض الاحداث ..

ف رايي الروايه كتبت علي عجل شديد ..

لكن عارفه ان عند الكاتبه في احسن تقدر تقدمه ❤️

❞ وأخيرًا، تعلَّمت شيئًا ساعدني على مواصلة الحياة، هي أنني لا أستطيع أن أتحكّم في القَدَر، لا أستطيع أن أتحكَّم فيما سيحدُث غدًا لأي أحدٍ مهما كان قريبًا، كل ما أملكه أن أستيقظ كل يوم وأحاول أن أحقِّق ولو جزءًا بسيطًا من أحلامي، هذه هي الحياة، أن أتقبَّل ما يحدُث خارج إرادتي وأعاود محاولاتي كل يوم بشغَفٍ.❝

#أبجد

#سرداب_قصر_البارون

رواية تحكي عن اصحاب لقوا انفسهم في لعز ومتاهة عن قصر البارون.

#أحمدمجدي

عندي خلفية بسيطة عن أجواء الرواية وعندي توقعات عن الرواية ومش عايز أقول إنها توقعات كبيرة لكن خلوني أقول إني متحمس للقراءة والتعرف على الكاتبة.

وزي العادة خلونا نبدأ مع الأنطباع الأخير.

أول ما وصلت للنهاية وخلصت الرواية لقيتني بقول في نفسي "البدايات حمادة ... والنهايات حمادة تاني خالص"

وتعالوا نشرح ده جه إزاي

ويلا بينا نبدأ المراجعة مع الانطباع الأول.

الأنطباع الأول كان مع تقييم العمل - كعمل رعب - والغلاف اللي كان نمطي شويتين مش جذاب في الحقيقة ويمشي غلاف رواية رومانسية أكثر منها رعب.

عندنا أيقونة أم المسيح المقدسة مع طفلها مع صورة لأمرأة من الخلف قصاد ممر حديقة قصر قديم.

اكتر حاجة مرعبة في الغلاف هي العنوان وعلى العموم الغلاف بيكون خارج التقييم لكنه مهم في الإنطباع.

وتعالوا نتكلم عن البداية والافتتاحية.

ولازم نتكلم عن الكلمة في بداية العمل مكان الاهداء لأنها كانت البداية القوية بجد للعمل.

أنا بحب الكلمات المفتاحية دي واسمحولي هنا نبدأ مع الكلمة دي

❞ المشاعرُ الإنسانية المُتداخلة والمُتضاربة والمضطربة لا تُنسى، ونحن نمضي في الحياة على أمل النسيان، لكنها قد حُفرت بداخلنا وانتهى الأمر، حتى نجد أنفسنا واقفين أمامها ‫ وجهًا لوجهٍ. قلبًا لقلبٍ. وسيفًا لسيف ‫ ونرى أسقامًا كثيرة قد ملأت نفوسنا ‫ ❝

يعني نقدر نقول إن كلمة المقدمة كانت حلوة وبالنسبة ليا أنا حبيتها.

أما عن افتتاحية الأحداث فهي كانت تقليدية أو نقدر نقول مش مثيرة للخيال أو الرعب.

الافتتاحية كانت على لسان واحد من ابطال القصة رامي اسحاق اللي بيحضر حفلة في الساحل الشرير.

وأه بالمناسبة كل شخصيات العمل من الناس اللي بتحضر حفلات الساحل من الكومينتي بتاع مدينتي من الناس اللي معندهاش مشاكل مع أسعار الإيجارات أو سعر الروايات.

الموضوع في الرواية اجتماعي نفسي شوية، كلام عن الوحدة والهروب والأحلام والمستقبل والشعور بالذنب.

الفصل الثاني على لسان والد رامي نتعرف على المزيد من المعلومات عن رامي، وبعدين الفصل الثالث على لسان أخت رامي ونستكمل الحكاية وهكذا.

المهم مع القراءة انا عن نفسي بدأت أتوغوش، بعد الفصل الأول والثاني والثالث لقيت إن مفيش إثارة ومفيش غموض ومفيش رعب!

ومع الصفحة رقم خمسين كنت خلاص وصلت لقناعة أن الرواية هي رواية اجتماعية نفسية وبدأت التاقلم على كده وبدأت التعود على شخصيات الرواية.

مشكلة الفصول الأولى هو الشعور بالملل مع عدم وجود أحداث قوية او سؤال محوري يخليني أكمل القراءة،

من وجهة نظري المتواضعة لازم يتم إضافة فصل في أول العمل أو مشهد في البداية يكون مرعب أو مثير أو غامض يخليني أنا كقارئ أكون عايز اعرف وصلنا لكده إزاي.

المهم ولحد الصفحة رقم ١٠٠ تقريبا - يعني بعد ثلث الرواية تقريبا - فجأة الرواية تنفجر في وشي مع جرعة غرائب وعجائب وطرائف، شوية رعب مع شوية تشويق وإثارة وغموض وألغاز.

هو في أيه بقى؟ ايه التحول ده؟؟

متخيل يا مان إنك تبدأ تقرأ رواية رعب ومتلاقيش رعب وبعد ثلث الرواية تلاقي رعب وإثاة وتشويق؟

ويلا بينا نتكلم عن العمل وفكرته.

فكرة العمل ببساطة هي طرح بعض المشاكل والتعقيدات الموجودة في العلاقات الأسرية الاجتماعية في حياة أبطال العمل، عندنا حياة اجتماعية مصرية كاملة في مجتمع خاص شوية لكن بالتأكيد عنده مشاكله وأسراره الغامضة.

وفي خلفية الحياة دي موجود سر وميراث من الرعب والأساطير، وعندنا مغامرة مرعبة فعلا هتقلب كل حاجة في حياة كل الأبطال.

وتعالوا نتكلم عن اللغة في العمل.

لغة الرواية عربية فصحى في السرد والوصف لكنها عامية في الحوار، عندنا نسبة الحوار في الرواية مش كتيرة جدا لكنها كانت في نظري مناسبة للأحداث.

الكاتبة عرضت الرواية على لسان أبطال مختلفين كل فصل من رواية واحد من أبطال الرواية يستكمل الأحداث.

نقدر نقول إن اللغة في الرواية مناسبة لكل الفئات والرواية تصلح للناشئة ومفيهاش تعقيدات لغوية واستعراضات بلاغية من اللي بحبها.

عموما بعض الجمل في الحوار أو في السرد ممكن تقف معاها وتقول يا سلام يا سلام زي الموجودة في الصور مع المنشور - بصه كده عليهم وقول رأيك -‏

كانت طريقة سرد الرواية هي أحلى ما في الرواية من وجهة نظري طبعا وكان ملموس جدا في الفصول شخصية كل بطل اللي كانت مختلفة في الدوافع والقيم والشخصية،

ويلا بينا نتكلم عن الشخصيات

الشخصيات كانت كتير شوية لكن ملمومين في مغامرة واحدة، كان في شخصيات كنت فاكر إنها رئيسية زي رنا لكنها ظهرت مرة واحدة واختفت بعد كده وشخصية خالد كان تقديمها طويل جدا ومفهمتش ليه غير في النهاية.

لكن المميز في كل الشخصيات إنها مرسومة بعناية وواضحة في الشخصية والسلوك والنمط الفكري والاجتماعي.

انا قدرت أتعايش مع الراوية في البداية وكنت فاكر إنها اجتماعية وقدرت أتعايش أكتر مع الرواية لما تحولت إلى رواية رعب وغموض.

وأخيرا تعالوا نتكلم عن الخلاصة.

رواية سرداب قصر البارون هي رواية حلوة يا جماعة فيها فكرة اجتماعية جميلة ورسايل مستترة في الأحداث من غير توجيه مباشر من الكاتبة وده شيء عجبني جدا.

يمكن عندي بعض الأسئلة والاستفسارت اللي ملقتش عنها إجابة في العمل لكن أنا مبسوط بالتجربة ككل ومبسوط بالنهاية اللي كانت مرضية.

أكيد بنصح وبرشح الرواية للقراءة.

رغم استخدام الكاتبة لتكنيك تعدد الرواه، إلا أنه لا يوجد فرق بين لسان المهندس رامي الذي عاش عشرون عاما في الخارج، و صباح الخادمة!

فلا يوجد ما يميز كل لسان.... حتي تفكير الجميع رجال و نساء متشابه و يكاد يتطابق و اعتقد أن الأنسب كان استخدام تكنيك الراوي العليم و بذلك تهرب الكاتبه من فخ اللسان الواحد المتكرر.

- الحبكة ضعيفة جدا و لا توجد قصة بالمعني، رغم أن الأسلوب مشوق و هو ما دفعني لإكمال الرواية إلا أن النهاية ضعيفة جدا

- لا يوجد مبرر لتصرفات هيلانة، و لا كيفية تلبسها جسد سلمي أو سبب فعلها ذلك و لا يوجد سر غامض أو حتي فكرة مثيرة، و لا يعقل أن ينتهي كل شيء بحوار بينها و بين نزار الذي تلبسته روح البارون ليخبرها أنه يحبها!!!

- لا يوجد سر خفي مثلا سيتكشف بمرور الأحداث!

- الروايه كان من الممكن أن تكون أفضل جدا بمزيد من الجهد

اللغة سهلة وبسيطة. لكن كقصة واحداث من اسم الرواية توقعتها اقوى بكثييير من الي قراته. والنهاية وبعض الاحداث غير مقنعة. الى الحين ما فهمت وش علاقة السرداب والكنيسة!! هم كسروا باب الغرفة الوردية بس ولا فتحو سرداب ولا شيء. فحسيت في لخبطة، تقريبًا مو سيئة لكنها ليست كما توقعت

مقدرش اقول غير انه كتاب ممتع لاقصى درجه

مروى جوهر قدرت تخليني منبهره وفي اثاره طول الوقت وعماله افكر واحاول اتوقع

كان ليه مذاق خاص لاني من مصر الجديدة والقصر ده جزء من حياتنا وققصه الكتيره

برااافو وبالتوفيق يارب

قصة وأحداث مشوَّقة، لغة بسيطة و سلسة ، وصف القصر وتفاصيله رائعة، وصف شعور كل شخصية كان مُبدع.

نهاية قصة البارون والقصر كان ممكن تكون أقوى من كده.. لكنها تظل رواية رائعة استمتعت بيها🤍🙏🏻

تقييم/ ⭐️⭐️⭐️⭐️

الرواية تجمع بين التشويق والغموض، فيها كمية ألغاز تخليك تعيش جو من التوتر والإثارة من أول صفحة لآخر صفحة. انهيت الكتاب ف جلسة واحدة معرفتش اسيبه غير لما اخلصه حرفيااا.

بداية القصة كانت مملة شوية لكن مع مرور الصفحات أصبحت أكثر جمالا حتي انهيت قراءتها في يوم واحد،، في انتظار الجديد

نبوءة قصر السلطان

عمارة داوود

مازالت أفضل الاعمال

عانصح كل شخص ان يقرأ هذا الكتاب لانه افضل كتاب و انه يجذب القارئ و احب ان اشكر المؤلفه مروي جوهر علي هذا الكتاب الرائع و شكراً 🌹🌹🌹 أعظم روايه بعد ارض زيكولا

رحلة فى اثر مصرى

جذبتني القصة و لما استطيع ان اتركها حتى انهيتها

غموض و تشويق و إثارة

حبيت الرواية والغاز قصر البارون

واتمنا ازوره في القريب العاجل

شكرا للكاتبة😘

رواية رائعة فكرتها جديدة والأحداث مشوقة جدا ، استمتعت بقراءتها

هوا ازاي اعمل كتاب علا الططبيق