اقتباسات من كتاب ذكر شرقي منقرض

نرجسية الذَّكَر الشرقي بتخليه شايف نفسه دايمًا على حق، لا يتخيل ولا يقبل إنه يعترف بخطئه.. لا يتحمل أي درجة من الرفض أو عدم القبول.. وبيربط كل ده- بشكل عجيب- بكرامته وتقديره لذاته.

فالمرأة هي المتسبب دائمًا.. وهي المتهم أبدًا.. في أي اعتداء أو جريمة أو مشكلة تخص الجنس أو العِرض أو الشرف.. من أول «إيه اللي وداها هناك؟»، لغاية «سينتهي الغلاء حينما تتحجب النساء»!!

الشخص النرجسي ده حد وصّل له طول عمره إنه مايستاهلش.. فقرر يصدق إن مافيش حد يستاهل غيره..

جزء أصيل من الذكورية الشرقية هي تلك السلطة الأبوية اللي بيمارسها الذَّكَر على مَن حوله.. على أخته، على أخوه الصغير، على أمه أحيانًا، على مراته أكيد، وعلى أولاده جدًّا.. سواء الذكور أو الإناث..

‫ «عدو المرأة الحُرة ليس الذَّكَر المُتعالي فقط، بل عدوّتها أيضًا المرأة الراضية بالعبودية»..

الحقوق تُؤخذ.. ولا تُمنح

مافيش حاجة في النفس البشرية أصعب من وجود مشاعر متناقضة ناحية نفس الشخص..

ما ينفعش أشوف النهارده بعدسة إمبارح اللي أثبتت قصورها.

‫ عقلية مجتمعية تظلم الرجل والمرأة على السواء.. تختزل المرأة في الخدمة.. وتختزل الرجل في الصرف.. ويبقى هو ده الجواز.. وهي دي الحياة الزوجية.

الذكورية الشرقية مش بس مرض.. بل هي متلازمة مرَضية كاملة.

الذكورة هي النوع.. الرجولة هي الفكر..

‫ الذكورة هي الجنس.. الرجولة هي السلوك..

‫ الذكورة هي البيولوجيا.. الرجولة هي الموقف.

،،

المفتاح هو إنك تصدقي إنك إنسانة حُرة.. مافيش حد من حقه يقيد حريتك.. أو يملكك.. أو يفرض عليكي حاجة رغمًا عنك..

⁠‫محتاجين تأهيل نفسي قبل الخطوبة وقبل الزواج وبعد الزواج وقبل الإنجاب وبعد الإنجاب وأثناء التربية.. ولَّا أقول لك.. إحنا محتاجين برنامج تأهيل نفسي يستمر مدى الحياة لمدة ثلاثة أجيال قادمة على الأقل..

الذَّكَر الشرقي اجتزأ بعض النصوص الدينية، وأخرجها من سِياقها الزماني والمكاني، وابتعد بها عن أسباب وظروف نزولها.. وأنتج «نسخة ذُكورية من الدين»، ليس لها أي علاقة بالدين الحقيقي.

الذَّكَر الشرقي- بكل ظُلم وافتراء- استخدم الدين شخصيًّا.. لحساب أغراضه الذكورية..

⁠‫الذَّكَر الشرقي اختار أن تكون ذكوريته هي دينه.. لا الإسلام.. ولا المسيحية.. ولا أي دِين آخَر..

ذَكَر مقسوم نصفين.. نصف شديد وقاسي ومُتسلط على امرأة «في البيت».. ونصف ذليل وخاضع وخاشع لامرأة أخرى «بره البيت»..

‫ ذَكَر فيه كل تناقضات الدنيا.. وكل المعايير المزدوجة.. وكل انفصامات الشخصية..

‫ ذَكَر مُرعب شنيع منيع من الخارج.. هش مكسور جريح من الداخل..

‫ يا سلام بقى لما الذَّكَر «أبو مراته».. يرتبط بواحدة بتدور في جوزها على «أب».. يرشدها، يحميها، ينصحها، يحسسها بالأمان (الناقص المشروط- اللي هو أصلًا شعور داخلي ماينفعش حد يحسّسه لحد).. كده تبقى كملت.. واتظبطت.. واتحققت نظرية «Key and Lock» في العلاقات؛ «يعني القفل ده مش هيفتحه غير المفتاح ده»، وربنا يوفق الجميع.

_محمد طه

هاختم الفصل ده بجُملة شهيرة للشاعر مُريد البرغوثي:

«عدو المرأة الحُرة ليس الذَّكَر المُتعالي فقط، بل عدوّتها أيضًا المرأة الراضية بالعبودية»..

رحمتك يا رب..