حكاية ٣ شخصيات ( سيد، حسناء وصباح)

كل واحد منهم بيحكى قصته واللى وصل له سببه ايه

عندك سيد شاف الفقر وأمه بتموت منه قدام عينيه

ابن التربي شاف الذل من اللى حواليه

هنقول مش مبرر للى وصل له … صحيح

بس كل واحد على قد تفكيره هنعمل ايه 🤷‍♀️ ما تعاطفتش معاه يمكن وهو صغير أكيد لكن لما كبر واتحول للى بقى فيه كرهته وكرهت النسخة الجديدة اللى بقى عليها.

أما صباح وديه اللى اثرت فيا إلى حدا ما … ظالمتها ببئتها والبيت اللى اتربت فيه

لسه فيه بيوت فى الصعيد بتعامل البنت كأنها شىء مشين أو شىء موجود فى البيت مهمته خدمة الغير

وبعد ما توصل سن معين مصيرها تخدم فى بيت الزوج اللى مالوش مثيل … تفكير عقيم

مع أن ما يعبهاش شىء بس هو كده سلو بلدهم هنعمل ايه 🤷‍♀️ كان كل أملها تتجوز اللى بتحبه من سنين وتلاقى الحنية والحب وتتربى عليه

لكن قسوة الأهل خليتها بصيت للى فى ايد الغير واتمنت يحصل تبديل اشمعنا هى وناقصها ايه

أما حسناء فـ ديه بقى لا بها ولا عليها لقيت نفسها لعبة فى ايد كوابيس مش سايبها ولا فى أحلامها ولا فى يقظتها

وكل ذنبها أنها حبيت واتحبيت وكانت جميلة لحد ما ظهرلها الكائن الغريب اللى حول حياتها لجحيم…

طيب ايه علاقة الـ ٣ دول ببعض

هتعرف من الأحداث ايه اللى ربطهم ببعض

الرواية بالنسبة ليا كانت عادية، فكرتها مكررة يعنى قصة الأعمال والحسد شوفتها فى روايات كتير محستش بتجديد …عجبنى الأجزاء اللى ذكر فيها تفاصيل عادات الصعيد..

اسلوب كتابة حلو مش هنكر بس حسيت بتطويل والنهاية ما أقنعتنيش يمكن الظلم الأكبر كان من نصيب شخصية ما ما تستاهلش اللى وصلت له🥺

ممكن الرواية تبقى مش ذوقى لأنى مش بميل للنوع ده بس اهى كانت تجربة بعد انفطاع طويل عن روايات السحر والجن والعفاريت 😊