ريفيو رواية عكس اتجاه الصخب

نوع العمل : غموض نفسي

عدد الصفحات: ١٦٨ " نسخة الكترونية على أبجد"

عن دار إشراقة للنشر والتوزيع

للكاتب/ عمرو دنقل

*****

❞ في الأوراق، سرٌّ جاذِب يطبع داخلك روحَ صاحبه. بل قد يَصل بك الأمرُ إلى التحدُّث بلُغته ولَكْنته، وهذا ما حدثَ معي. ❝

باستخدام طريقة الراوي العليم تم سرد أحداث الرواية، الرواي اللي من اللحظة الأولى بيحط بين إيديك مفاتيح شخصيته، وكل أحداث حياته، لدرجة أنه بيعترفلك بكارثة في أول سطر.. قمة الوضوح ؟ الحقيقة لا

مع كل سطر، وكل ما تتقدم في الأحداث والحكي، هتلاقي نفسك بتمر بنفس " الإعصار" اللي بيمر بيه عقل البطل، واللي هو ناتج عن إعصار حقيقي كان في كل أحداث حياته..

التيه، التخبط، الغرور والثبات، اليأس والأمل، التسامح والكره، كلها مشاعر متضادة لكنها بتظهر في كلامه وحكايته بمنتهى السلاسة، السلاسة اللي بتغرقك معاه لحد ما تبقاش عارف تفرق ده وهم ولا بجد!

****

الرواية "بدون حرق" من الأعمال اللي بتناقش فكرة المرض النفسي، سرد بينقلك صورة حقيقية لحالة المريض بشكل بينقلك كل إحساسه كأنك بتعيشها بالظبط..

الفلاش باك اللي مش هتكتشف أنه فلاش باك الا في نهاية العمل

والبطل اللي هيتحرك بيك في أزمنة مختلفة، طفولة وشباب وكهولة عشان يربطلك الأحداث ويخليك تملك خيوط الحكاية لكن يفاجئك في النهاية أن الخيوط لفت على رقبتك معاه، ويوضحلك ان العقل البشري ليه طرق غريبة في حماية نفسه لما يتعرض للصدمات والمواقف الصعبة، طرق تخليه يكمل القصص المبتورة عشان يقدر يكمل ويعيش حتى لو في حدوتة جواه هو وبس..

******

العمل مكتوب بحرفية شديدة، وفي كل فقرة فيه مفاجأة معمولة باحتراف، سرد بدون أي لحظة ملل لحد كلمة الختام ..

وأسئلة كلها بيتم الإجابة عليها بعد ما الكاتب يديك مساحتك الكاملة في التفكير والتخمين، فبتفوز بمتعة الرحلة ومتعة الختام اللي مش سايب وراه أبواب مفتوحة ..

الكاتب كان متمكن من أدواته جداً، السرد، تصوير الأماكن، وصف الشخصيات ونقل مشاعرها، كأنك بتشوف المشهد مش بس بتقراه، مع لمسة تاريخية بين الأحداث عن أحداث سياسية كتير مر بيها الوطن، بين مرها وحلوها أضافت معنى وثقل للعمل..

الحقيقة أنه عمل ممكن تحب إنك تنهيه في جلسة واحدة من سلاسته وحفاظه على إيقاع التشويق اللي بيسحبك للنهاية من غير ما تحس

وممكن برضه تحب تقرأه على مهل عشان رحلتك مع آل علوي ما تنتهيش بسرعة ... وكنت أنا من الفريق الأول

شكراً للكاتب، دي قرائتي الأولى لقلمه وكان اختيار موفق وترشيح موفق جداً جداً من الجروب

تقبل مروري البسيط وبالتوفيق دائما

#نور