ممكن أيام وشهور تعدي في حياة الإنسان بدون أي حدث يذكر، وممكن في ساعة واحدة حياته كلها تتشقلب بسبب موقف أو حتى كلمة تغير كل ما بعدها.

تتعرض الرواية لعدة مواقف بتحصل لمجموعة من الأشخاص كل موقف فيهم خلى الشخص يعمل حاجة بتكون سبب لتغيير جذري في حياته، أحداث الرواية كلها لحظية وبتدور في نص يوم تقريبا، أحداث سريعة جدا فمفيش وقت نضيعه في بناء شخصيات وخلفية للأحداث، لأ احنا بنخش على طول في قلب الحدث، لأن الأحداث هي محور القصة مش الأشخاص اللي عايشينها. التعدد في قصص الرواية بيورينا كام حياة ممكن تتبدل ١٨٠ درجة في فترة قصيرة جدا، واختيار الفترة دي انها ما بين منتصف الليل وطلوع النهار دليل على ان مش بس ابطال القصة حياتهم اتبدلت في ليلة، لا دا ممكن كمان اللي حواليهم يدخلوا ينامو قبل القصة ما تبتدي ويصحوا يلاقو حال غير الحال.

مش كل وقت عدى عليك بدون أحداث معناه ان الدنيا ثابتة، كل لحظة بتعدي بيكون فيها الم وحزن وفرح ونهايات وبدايات لناس تانية حواليك.

محمد متولي