اول قراءات معرض ٢٠٢٥ 😍

عين القرش للكاتب أحمد علي

صدرت عن دار كتوبيا

في البداية خالص انا هبدء بأكتر حاجة بتشدني في الي رواية و هي .... تاااادااااا 🎵 .... الغلاف 😄

الغلاف اختياره كان مبدع الصراحة و متناسب مع احداث الرواية السوداوية القاتمة.

نيجي بقى للرواية نفسها :

عين القرش هي رواية جريمة بمذاق نفسي

- بتبدء احداث الرواية بشكل سريع ملفت بالنسبة لقارئة ملولة زيي ... 😄 يعني تحقيق .. و جريمة قتل غامضة ... ثلاث جثث مجهولة مش فاهمين علاقتهم ببعض . و دا بالنسبة لي عامل نجاح كبير ان من البداية عنصر التشويق متوفر و بيوعدك ان الرواية مش سهلة لا 😄

ف انا ك لبنى هعوز اكتر من كدا ايه بس 😍

- ننتقل بقى مع الكاتب لشخصية القاتل و نشأته و بداية قصته المأساوية .

و شخصية القاتل مرسومة بحرافية شديدة الصراحة .. ميكس جنون اضطهاد كدا على عقد طفولة طلعت لنا قاتل محترف بيختار ضحاياه بعناية بالغة و إن كان مقدرش يتخلص من عادة طفولية و هي حبه للشوكولاتة و دي كانت مشكلة بالنسبة لي اني خلصت كم شوكولاتات رهيبة و انا بقرأ الرواية لان نفسي كانت بتتفتح معاه😄

و مشكلتي التانية اني كنت متعاطفة مع القاتل بشكل كبير بدون حرق للاحداث( و لا بايني حرقتها؟ 🤣)

- نيجي للغة و الأسلوب:

- الرواية كلها بالفصحى من حيث السرد و الحوار ، اللغة سهلة و لطيفة بدون اي أخطاء ملحوظة و السرد كان سلس و انسيابي جدا يشدك انك لازم تكمل للاخر و تخلص الرواية عشان تعرف مصيرهم ايه .

في النهاية اتمنى الرواية دي متقعش في ايد قاتل مأجور بجد و نلاقى نفسنا بنكرر ماسأة بطل من ورق 😄 عشان وسائل القتل في الرواية مبتكرة و دقيقة و واضح ان الكاتب تعمق و بذل مجهود في الدراسة عشان يوصل لطرق تحقيق بعض الجرائم الكاملة .

شكرا احمد علي

حقيقي استمتعت بالرواية .-