كان عندي فضول اقرا الكتاب ده ولما لقيته نزل على ابجد ومفيش حاجة اخسرها خاصة ان عدد صفحاته ٩٤ صفحة فقط فقررت اشوف كده هي كاتبه ايه.
طبعا انا حقولكم في شكل نقط الكتاب ده عبارة عن ايه ومين اللى ممكن يلاقي فيه حاجة تكون مفيده له وده مش ريڤيو اكيد ، مجرد دردشه وانطباعات كده.
- الكتاب ده عبارة عن ايه بالضبط ؟
ده باختصار تجارب حياتية مرت بيها هيدي من طفولتها لغاية ما بقت ام وعندها ابن. هي مش بتديك حكم او مواعظ ولا دروس تنمية بشرية ، هي بس بتحكيلك ازاي هي واجهت المواقف دي وخرجت منها بايه.
- مين المستهدف من الكتاب ده ؟
الكتاب ده ممكن يستفيد منه اي ام او اب عندهم اولاد او بنات في مراحل سنية مختلفة زي المراهقة والدراسة والاختيارات الغير مدروسة والاندفاع غير المحسوب والحب والجواز والتربية الخ ووارد جداً يكون اولادهم وبناتهم بيتعرضوا لنفس المواقف دي او شوية منها.
- لغة الكتاب ؟
عامية جداً كأنها دردشة امهات مع بعض.
بس يا سيدي دي خلاصة الكتاب.