الواحد بعد ما يخلص قراية المجموعة القصصية العجيبة دي محتاج فنجان قهوة و يسند ضهره كدة... الموضوع غريب فعلا ، الفكرة غريبة رغم بساطتها ، اول تقريبا "شفرتين" بتقول تمام مجموعة قصصية كويسة مفيش مشكلة ، بعد كدة بتخش في مطحنة ، ماينفعش تفوت سطر ماينفعش تغفل عن تفصيلة ، لانها مجموعة قصصية مختلفة بجد عن تقريبا معظم اللي قريته!
منفصلة لكن متصلة مش بس في المضمون و الرسالة لاء متصلة في حاجات كتير!! مش عايز أحرق حرفيا
اللغة بسيطة جدا ورغم اني شخص بقدس اللغة و المرادفات اللي تخليني اخش ادعبس وراها و استفيد لانه ببساطة "أدب" واللغة أساس فلازم تكون اللغة فنانة تستفز دراوشها! .. لكني حسيت ان البساطة دي ملائمة جدا جدا بشكل غريب .. انك ماتركزش في حاجة غير اللي بيحصل هنا في القصص ، ماتطلعش برا دفتي الكتاب علشان تخلصه في نفس القعدة لان ده ضروري جداً!!
وانا اقدر اقول ان الكاتب قاصد ده لاني قرتله "تصريح دفن" واللي كانت اللغة محترمة جدا!
القدر هو البطل و العالم هو الاوضة اللي بيحصل فيها كل حاجة بمعنى الكلمة!
فكرة انك تخبط في كتف شخص و انت ماشي رايح مشوار ، الشخص ده انت ماتعرفوش مجرد انك خبط في كتفه مثلا و اعتذرتوا لبعض عادي وتمشي وخلاص مش بعيدة انه يكون عنصر اساسي في قصتك انت من غير ما تعرف ، تعيش و تموت و انت ماتعرفش!!
في النهاية بدون تطويل اكتر من كدة .. السؤال المهم بالنسبة ليا .. السنة لسة في اولها و لسه ان شاء الله في قراءات كتيرة في ألوان مختلفة ، هل هتقدر مثلا عشر أعمال في السنة كلها انها تزحزح مكان المجموعة دي من مكانها المحفوظ في قائمة افضل قراءات ٢٠٢٥ ؟! .. هنشوف! 💪😂
صديقي العزيز الغالي أستاذ أمير عذب ، كنت قد أعلنت أني فرد في رهطك "أدبيا" في أولى قرائتي لك ، والآن أود أن أعلمك أني قد أقسمت عهد الوفاء!! ❤️❤️👏👏👏