- رواية حلوة تستحق القراءة و عجبني انها بدات في الاحداث بالبلدي كده بالصدفة سهرة صحاب قلبت جد و بدات احداث ومغامرات من وراء الخيال العمل فيه دمج بين الفانتازيا علي حته ماورائية علي جزء اجتماعي و سياسي.
اعتقد اني مش عارف اكتب عن الرواية يمكن ده جاي من اني عاوز اكبر قدر ممكن يقرااها بدون ما احرق احداثها في راي عنها .
- فكرة اني الكلمات المحلية الخاصة بكل بلد اتعمل ليها هامش و اتفسر معانها فكرة حلوة جدا و اضافت للعمل عشان اقدر احس اني عايش فعلا احداث بتدور في الاردن و اماكن تانية .
- العمل سلس بطريقة غير معقوله و دي نقطة تتحسب للكاتب انا في وقت من الاحداث كنت بجري مع الاحداث .
- في رأي الشخصي المتواضع اني الكاتب متاثر باعمال المؤسسة و عشان كده تحس اني العمل فعلا طالع فيه من روح الاعمال القديمة .
- بالرغم من اني ده عمل الكاتب الاول الا انه قدم مستوي جيد جدا و ان كان في بعض الاخطاء البسيطة اعتقد في الاعمال القادمة هيقدر يعالج الاخطاء دي .
- رسم الشخصيات في العمل كان جيد الي حد كبير جدا و ان كان عندي ملاحظات عن شخصية مصطفي الحفار في نقطة الشغل و الوظيفة .
- عندي ملاحظة صغيرة علي كلام مصطفي ل ياسين و هو بيحكي في الرسائل احداث السفر كنت بحس اني الموقف بيتحكي علي انه هيحصل او توقع يحصل كده لكن بيطلع هو ده اللي حصل فكان الاسلوب ده مربك بالنسبالي بس يمكن في الاخر اتعودت و فهمت بس اعتقد الكاتب ممكن يغير الطريقه دي يبقي افضل .
- اعتقد ني الاعمال اللي زي ده هي اللي اتعملت عشانها المسابقات عشان تظهر اعمال تستحق القراءة .
⚠️ كام ملاحظه فيهم كشف للاحداث :
- نقطة وجود جزئين من الخريطة في رحلة واحدة اعتقد انها كانت محتاجه تفسير من الكاتب جت ازاي و ليه و ايه السبب اني نلاقي جزئين في مغامره و كمان ازاي قدر مصطفي يروح يخبي الجزء ده .
- بالنسبة للنهاية اعتقد كان ممكن تتطلع بشكل افضل من كده بحيث علي الاقل تقفل الاحداث بشكل كويس حتي لو افتراضنا اني هنكمل الاحداث بجزء تاني و بالمناسبة العمل و الاحداث تسمح بجزء تاني .
- نقطة كشف مكان مصطفي و هو في شكل الجن اعتقد اني الكلمه بتظهر نفسه بس مش هتظهر نفسه و الجني اللي كان معاه .