مبدأياً كده اللى رايح يسكن فى بيت سواء جديد أو حد كان ساكنه قبله ما يقرأش الكتاب ده 😄

طيب لو رايح مستشفى 🏥 تتعالج ما تتعالجش 😄 ما انت مش ضامن ماضى المستشفى كان ايه

مش يمكن كانت زمان بيتعالج فيها مصابى الحروب

ولعنتهم هتحل عليك

أو حطوا فيها الميتين

ولا يمكن كان بيتعمل فيها تجارب 🔬 على اللى موحودين 🤷‍♀️

اممم طيب وبعدين 🤔

استنى كمان لو نفسك هفيتك كمان تروح أوتيل 🏨 تقضى يومين تريح أعصابك من الروتين لازم تتأكد أن مكانش فيه نزيل اتقتل فيه أحسن يطلعلك شبحه بليل 🌙

يعنى دلوقتى أروح فين 🤔

أمشى فى الشوارع والميادين

لا برضه مش فى أى شارع ولا مدينة مش يمكن تبقى مدينة مسكونة من أيام البيزنطيين 🤷‍♀️😄

قفلتها فى وشنا الكاتبة هبة جاوبش بكتابها عن الساكن الآخر اللى احنا عنه مغيبين..

بنشوف أفعاله وخاصة بليل 🌙

يخلينا كده على بعضنا مش قاعدين

فيهم الطيب وفيهم الشرير

واللى بيلعبك ويسليك

واللى بيبقى عايز يوصلك رسالة عن اللى كان فى المكان من قبلِك..

كتاب مجمع لقصص حصلت بالفعل على لسان اصحابهم فى أزمنة وبلاد مختلفة.. حبيت الكتاب بالرغم من القلق 😄 تحسه مقالات بس فى صورة تخطفك اللى هو أنت لسه هتتخض ادخل على اللى بعده 😄 اللى بيحب يقرأ أو يتفرج على النوع ده حتى من الأفلام يبقى هيعجبه الكتاب 🤷‍♀️

كل اللى عليك …ولع 🔥 بخورك واقرا أذكارك 📿 واستعذ بالله من الشيطان الرچيم وغطى رجلك قبل ما تنام احسن يسحبك منها من على السرير 👻

#مكتبة_دنيا

#قراءات_٢٠٢٤