الرواية جميلة وبسيطة بدون تكلف

ورغم انها اول مرة اقرا للكاتب لكن الشخصيات مرسومة بشكل متوازن وجميل ودة ساعد كتير اني اتخيلهم واتعايش معاهم و اندمج بشكل كامل في الاحداث والازمنة المختلفة. لدرجة اني انتقلت من رفضي للفكرة ولشخصية شهاب في اول الرواية للتعاطف الشديد معاه في آخرها

اللغة لطيفة بدون استعراض وعجبني جدا المزج بين الفصحي والعامية في الحوار اللي كان حيوي ومعبر رغم ان السرد اللي بالفصحى كان اقوى بشكل واضح

استخدام الاغاني في المواقف المختلفة بصراحة كان عبقري وساعد جدا على الاندماج. في لحظة احس بجو التسعينات وانطلاق المشاعر في سن الشباب وفي لحظة تانية احس بالعكس ( رغم ان كان في اغاني اول مرة اسمع عنها بس اختيارها كان موفق جدا)

تتابع الاحداث كويس جدا رغم ان كان في عشوائية في الربع الأول من الرواية او خلينا نقول عدم ترابط في المواقف نوعا ما ولكن بعد كدة السرد والتتابع بقى اقوي وسلس اكتر بكتير

بشكل عام الاسلوب يخليك تحس انك بتتفرج علي فيلم سينما متكامل العناصر من تمثيل وموسيقى تصويرية واخراج وبصراحة كانت تجربة ممتعة وتستحق اكتر من 4 نجوم بشوية ( وعشان كدة هحط 5 نجوم 😉)