لقاء جديد مع الغالي علي قلبي المحلل النفسي الشهير في السويد سيباستيان بيرجمان بعد اول لقاء في اسرار قاتلة و كانت السبب اني اقع ف حب الشخصية الغريبة المعقدة اللي انا فعلا متعاطف معاها لو هي موجوده في ارض الواقع .
بالنسبالي ده اكتر فريق تحقيق في جرائم عنيفة متكامل طبيبة شرعية اورسولا / بيلي ضابط الشرطة و خبير تقني / فانجا ضابطة شرطة شاطرة و ليها شخصية / قائد الفريق توركل عارف يلم الفريق ده غير انه ضابط له خبرة / و طبعا المحلل النفسي بطالنا سيباستيان الخبير في التحليل النفسي .. بنشوف تطور في الشخصيات و حياتهم الشخصية بجانب التحقيق في الجرائم.
يمكن اللي قرا عارف الازمة النفسية اللي بيمر بيها بيرجمان و عارف ايه الصدمة و المفاجاة اللي قفل عليها اسرار قاتلة و بنشوف في الرجل الذي يراقب النساء تاثير ده عليه و ازاي بدا يحاول انه يغير من حياته و لو تغير بسيط .
لو حط عنوان مختلف للعمل ده هيبقي مطارده مع الماضي لاني بنكتشف اني الجرائم الجديدة اللي هتتسبب في انضمام سيباستيان لفريق ريسكمورد مرة تانية ليها علاقة بفترة سطوع نجم بيرجمان .
بالرغم من تعدد علاقات بيرجمان النسائية و معروف عنه انه زير نساء الا اني في علاقة هتدخل حياته و اعتقد انها هتغيرها اكتر في الجزء الجاي لاني العمل قفل علي لقطة تجيب جنان.
انا يمكن عاوز اكلم عن نقط كتيرة في العمل و عن تحول الشخصيات لكن بفضل عدم حرق تفاصيل و احداث عشان تجربة القراءة تكون كامله .
بالنسبة للترجمة فالترجمة ممتازة 5 نجوم و ان كان في كام خطاء املائي بس في نطاق ضيق الصراحة .
عندي عتاب علي دار العربي في العمل ده و ده جاي من اني بحب شغل الدار و يهمني تبقي دايما في احسن صورة العمل عشان حجمه كبير فالدار ضغطت السطور و بقي في سطر واحد رد شخص و رد الشخص التاني في المحادثه اه في علامات تنصيص الا اني ده سبب ازعاج ليا جدا فيارت ده بلاش يتكرر تاني حتي لو هيجي علي حساب سعر العمل لاني ده مزعج جدا في القراءة