💥أستمتعت جداً بطريقة الكتابة المشوقة اللي بجد خلتني محسش ابداً بالوقت ولا الملل ولو للحظة واحدة بالرغم من حجم الرواية الكبير، وبجد لازم اقول ان أسلوب الكاتب أتطور جداً وطريقته فالسرد وحتي في ترتيب افكاره كان مختلف تماماً عن روايته الأولى المسافر صفر، ومع اني من عشاق رواية المسافر صفر ولكن برغم ذلك احب اقول ان ساو باولو ١٣ افضل واقوي بكثير من حيث الحبكة وطريقة سرد وترتيب الاحداث، حقيقي الكاتب تفوق علي نفسه بشكل ملحوظ جداً. 👏🏻
💥أنا منبهرة بالرواية حقيقي ازاي كاتب يقدر يكتب رواية خيال علمي في ما يقارب ال٧٠٠ صفحة بالتشويق والإثارة والحماس ده حرفيا مفيش جزء ممل فالرواية ابداً او ملوش لازمة او مثلاً تحس ان الكاتب بيحشي اي كلام وخلاص عشان يملي الرواية وتطلع بالحجم الكبير ده، بالعكس هو حرفيا مش هيسيبك تمل وكمان هيفضل يجذبك بالأحداث من اول صفحة فالرواية لاخرها.🔥
💥عجبني جداً المعلومات اللي فالرواية، بحب لما أكون بقرأ رواية زي ما بستمتع بأحداثها برضو تكون بتضيف معلومة جديدة ومفيدة لي، وده موجود الرواية، ده غير وصف الكاتب للبرازيل بأجوائها الرائعة ومعالمها المميزة وكأنك سافرت هناك، بجد كنت حاسة اني عايشة مع أبطال الرواية متخيلهم وشايفهم كأني بتفرج علي مسلسل خيال علمي قوي علي نتفليكس. 🔥
💥حبكة الرواية وتشعباتها والشخصيات وخصائصها والحوارات والمعلومات اللي فيها ممكن تلهم وتساعد اي كاتب في كتابة رواية مشوقة محبوكة بعناية وإتقان.
💥الرواية فيها حس فكاهة أضفيت متعة ولذة علي القراءة، شخصية (بالبينو) كانت طريفة جداً، وعجبني جداً فصول شخصية (أسعد القاضي) مكتوبة بطريقة مختلفة ولذيذة.
💥نهاية الرواية هتفاجئكم جداً، نهاية قوية وغير متوقعة.🔥
💥باختصار شديد الرواية تستحق انها تنجح وفعلا تستحق القراءة مش هتندموا علي ولا لحظة قضيتوها في قراءة الرواية. 😍🔥