#سفريات2024

#أيامي_مع_كايروكي

أنا مش موهوب أوي، بس بشتغل كتير، وده اللي كتير بيقولوه على كايروكي، مش أكتر ناس موهوبة، بس أكتر ناس بتشتغل»

دي أول جملة لفتت نظري ف الكتاب، كانت البداية الحقيقة لمعرفتي بكايروكي، اللي بدأت بداية غريبة جداً الحقيقة...مجرد سفرية وكنت محتاجة أفصل ب مزيكا جديدة ف طلبت من صحابي ترشيحات، وسط اغاني كتير لقيتني بكرر أغنية"كل حاجة بتعدي" بشكل مستمر، عدا كذا سنة لحد م لقيت الأغنية دي على "توتي باج" واكتشتف ساعتها اني بدون وعي "بدندن" الأغنية كتير وبقت زي أسلوب حياة...هتعدي

من سنة ونص تقريباً إتعرض مسلسل"ريفو" واللي كان بداية معرفتي الحقيقة ب "أمير عيد"، اللي مع الوقت ومع ارتباطي بالمسلسل بدأت أدور على أغنيه، لقيت منها حاجات كتير بتلمسني وبتقول اللي جوايا، هنا بقيت "فان" ل كايروكي

كل دة رحلة شخصية بحته، الحقيقة عمري م فكرت أقرأ عن فرقة موسيقية، بس لما عرفت أمير عيد كنت مهتمة أعرف الخلفية، مع بدايات سبتمبر اتفقنا انا و"العصابة" إن القراءة الجماعية الجاية هتكون"أيامي مع كايروكي" للكاتب"ولاء كمال" والصادر عن"الدار المصرية اللبنانية"، الكتاب قدرت اوصله ورقياً بترتيب رباني بحت، بدأت الرحلة

الكاتب عرف كايروكي بصدفة برضة، ودة يمكن أول حاجة شدتني للكتاب نفسه، لأن فيه حاجات بتقع ف طريقنا بالصدفة وبتغير حياتنا...منها الكتاب دة والحكاية المهمة والملهمة جداً للفرقة دي...ليه بقى؟؟ خليني أحكيلك شوية عن الكتاب واللي جواه

أ.ولاء بيحكي عن بداية فكرة الكتاب، إزاي وصل ل أمير، ازاي قدر يقنعهم بالموافقة ع الكتاب ك فكرة، وبعدين بيبتدي يحضر معاهم كواليس اصدار البوم "نقطة بيضاء"

الحكاية جوة الكواليس والمكتب مختلفة تمامااااااااااً، مين يقول ان عشان تطلع أغنية واحدة بيحصل كل التعب دة من فريق كامل، من اول كتابة الكلمات اللي لازم تكون متوفقة مع رؤية الفرقي والمرحلة اللي بيقدموها، اللحن نفسه وإيه يبتدي قبل ايه وصوت ألة إيه يبقى أعلى من الألة التانية؟، التسجيل والبروفات الكتير لحد م يتفقوا كلهم على الشكل النهائي والمرضي، التصوير والترتيب ليه وكواليس التصوير نفسه...كل دة تعب على كل اغنية...فما بالكم بالألبوم نفسه لحد م يطلع لنا بالشكل النهائي، متنسوش الرقابة يا جماعة والمفاجآت الغير لطيفة أبداً اللي بتحصل طول الوقت

الكاتب قدر يدخلنا جوة استوديو كايروكي، مش بس الكواليس المهمة ومراحل ظهور الألبوم للنور من أول كلمة ف أول أغنية ولحد حفلة الإطلاق...لا كمان دخلنا جوة حياة اعضاء الفرقة نفسهم من غير م يبقى التركيز الكامل على أمير"المستحق جداً"، لأ...الكاتب عرفنا خلفية كل واحد ف الفرقة..إزاي اتعرف ع الباقي وازاي دخل الفرقة نفسها، ظروف كل واحد العائلية وكان بيشتغل ايه قبل الفرقة ودوره الحالي"الأدوار اتغيرت كتير بالمناسبة ويمكن اتغيرت تاني بعد صدور الكتاب"

الكاتب بيركز طول الوقت على طريقة تعامل اعضاء الفريق مع بعض، سواء ف الشغل وطريقة ادارتهم للخلافات الواردة جداً و طريقة تعاملهم برة الشغل كمان

عرفت حاجات كتير عن اعضاء الفريق، عرفت ليه أمير بيلبس اسود طول الوقت، ليه وزنه قليل كدة، ليه قال ف برنامج"انا متطمن ان لو جرالي حاجة اهلي هيفضلوا ف أمان مادي لأن الكل ف كايروكي واحد، عرفت ليه "تامر" بشوفه كتير بيمثل "واصلاً عرفته ك ممثل قبل معرفتي بالفريق"، عرفت كتير عن باقي الفرقة...شريف وهواري وغيرهم

"فإن النجاح لن يأتي فجأة، وإن تأخر فالحل ليس اليأس، ولكن أن تواصل ما تفعله بحب"

هنا كانت لحظة مفصلية ف مسيرة كايروكي، اللي كانت اتفككت تقريباً قبل الثورة"ولا ثورة إلا ثورة يناير"، لحد م بسبب إهانة إتعرض لها "أمير" كانت أغنية"اثبت مكانك" لو لم تخني الذاكرة، اللي ف ليلة واحدة بقت أيقونة الثورة، سبب تجمع الفريق من تاني...مين قال إن النجاح صدفة؟؟ النجاح بيجيي بعد تعب ومعافرة كتير جداً..ودي ملخص كايروكي

"كل فضاء تطوف به الموسيقى ، ‫لايعرف الحزن إليه طريقا"

الكتاب دة غير نظرتي للفريق كله، خلاني رجعت أسمع الأغاني بنظرة جديدة تماماً، مش هنسى إني كلمت"مونيكا" وانا مدمعة بسبب أغنية"كنت فاكر" ورجائها الشخصي إني"بلاش الأغنية دي دلوقتي إنتي مش ناقصة"، أغاني كتير بقت تلمسني أكتر من الأول ورؤية مختلفة تماماً لفريق مؤثر وهيفضل أيقونة ف تاريخ الموسيقى المصرية

كتاب جميل...مكتوب حلو وبسلاسة شديدة، عجبني جداً المزج بين رحلة الفريق و شوية من السيرة الذاتية للمؤلف، الفلاش باك ف اكتر من مكان، احترمت جداً إحتفاظ الكاتب ببعض التفاصيل بينه وبين أمير ف"قعدة فضفضة"

كتاب "اتمزجت" وانا بقرأه، حقيقي ممتع جداً

#قراءات_حرة

#قراءات_أكتوبر

#بصحبة_الرفاق

1/53