عارف لما تدخل على كتاب 📕
وتبقى مشمر الكُمام
وبتقول استعنت على الشقا بالله
هعرفكم يا شوية أوغاد 😄
وهوب وتلاقى نفسك بين صفحات الكتاب
وتطلع أنت كمان من الأوغاد 😄
بتتردد على لسانا كتير بطريقة sarcastique " أنا السىء فى رواية أحدهم " .. ما أنت سيء فعلا فى حياة شخصاً ما 🙋♀️😃 أنا بقولهالك بالأمانة 😌
طيب ازاى هو مش الكتاب بيحذر من الوقوع فى أفخاخ الناس… طيب مش يمكن أنت كمان تكون فخ لناس تانيين وأنت مش حاسس أنت بتعمل ايه 😉
الحقيقة أنى كنت داخلة أكتشف اللى حواليا واخد بالى من تصرفات الغير 🤷♀️
لكن لقيتنى من أول صفحة بدور على نفسى فيه…
ونسيت مشاكلى مع الآخرين..
قولولى ليه ..
الفكرة أننا دايما بنبص على غلطات الغير وبنطلع نفسنا أبرياء ومعصومين.. لكن ماذا لو أنت طلعت مش برىء ومؤذى بشكل أو بآخر للغير بتصرفات أنت مش واخد بالك أنها بتضر بيك وباللى حواليك..
مش لازم نطلع نفسنا ضحايا علشان نكسب تعاطف الآخرين ولو كلنا ضحايا امال فين المؤذيين 🤷♀️
كل واحد فينا بيأذى بشكل أو بآخر الغير…
والأذى مش لازم يكون بشكل شرير
ممكن بتعامل مش لطيف ده كفاية يخليك أنت الفخ للغير ويحاولوا يتفادوا الوقوع فيه..
الكتاب ده مش نيته الصراحة 😄 هو بيعرفك على الشخصيات المؤذية فى المحيطين سواء شريك، صديق أو حتى أهلك والجيران اللى حواليك..
أنا بس اللى اخدته من زاوية تانية وحبيت اطبق على نفسى وأشوف أنا مين من المؤذيين 😄 الاعتراف بالغلط مش عيب 🙋♀️ وأنك تبقى عارف ديفيوهاتك أفضل كتير من أنك تكابر وتتعب اللى حواليك ولا ايه 🤷♀️
مع أنى مش من هواة النوع ده من الكتب لكن حبيت أسلوب الكتاب وطريقته فى عرض الشخصيات… والأحلى أنى اكتشفت نفسى فيه 😂
شخصية واحدة اللى مافهمتهاش عايزة درس على جنب علشان افهم مقصود بها ايه 😁
ياترى بقى أنتوا واقعين فى الفخ ولا أنتوا نفسكم الفخ 😉🤷♀️⁉️