#سفريات2024

#كلبي_الهرم_كلبي_الحبيب

انا من عشاق أدب السير الذاتية، خاصةً السير المتعلقة بتجربة مرض ما، بحس إنها بتتميز بصدق من نوع خاص، والكتاب دة تحديداً أول م نزل عمل ضجة كبيرة ولكني فضلت تأجيله لوقت قراءة هادية، مفيش أهدى من رمضان عشان أقراه

الكاتب بيبتدي معانا الكلام بجمل صادمة "ثم جاء الفشل الكلوي أخيرًا، واكتشفت أنا أن ذلك الأسد المرعب، الذي أمضيت عمرًا كاملًا أتهيب لقائه، ما هو إلا قطٌ أليف يرقد في حجري طوال اثني عشر عامًا بينما أنا أمشط شعره الجميل بأصابعي"، بداية بتقول إن اللي جاي جوة مش مجرد مذكرات، لأ...دة وجع خام، قد كان

بيحكي لنا "أسامة" عن رحلة مرضه بطريقة "الفلاش باك"، ف البداية تقريباً من نص الرحلة، بيرجع بينا لفترات طفولته وبداية المعاناة، طرق العلاج البسيطة ف الأول ومراحل تطورها، أكتر ناس كانت قريبة منه سواء من الأقارب زي جده وبعده عمته، فترات الحجز في المستشفى وتأثير دة عليه نفسياً ودراسياً كمان، الدكاترة المعالجين و المستتشفيات اللي اتحجز فيها، مراكز غسيل الكلى المختلفة ف النص كمان بنتعرف على قصص الحب اللي بدأت وانتهت ف فترات مرضه الطويلة

أسلوب أسامة ساخر على مدار الكتاب كله سواء ف السرد البسيط أو محاولات التعايش المستمرة طول الوقت رغم الألم وتطور المرض، ودة بالنسبة لي بيقول إن الوجع كان فوق طاقة الإحتمال ولكنه قرر مواجهة الألم بالسخرية، بعكس كتب تانية بتنقل لنا التجربة بطريقة مباشرة زي "مسار الأزرق الحزين و بدون سابق إنذار وغيرها كتير"

ف الكتاب مش هنسى دول

*في نهاية فصل "تبول لا إرادي" "لقد خرجت من هذه المواقف بحكمة: (إذا اضطررت إلي السير حافياً في المدينة، فلا تنظر إلى قدميك كل دقيقة خجلاً، بل ارفع رأسك، وانس ذلك تماماً...ولن يلحظ الجميع شيئاً)...بطريقة ما بعمل كدة من سنين ف مواقف حياتيه مختلفة

*في نهاية فصل "د.محمد صفوت" جملة اتقالت بقوة على لسان الدكتور

"إيه الكلام الفارغ وشغل العيال دا؟ انت فاكر نفسك مين؟ انت هتعدل ف شغل ربنا؟ بطل حماقة يابني واياك تفكر ف الكلام دة تاني.

كتاب بينقل سيرة مدهشة بالنسبة لي، مقاومة طول الوقت وتعايش مع الظروف بشكل فيه قوة كبيرة، ملهم للغاية رغم الألم والسخرية

كتاب لازم يتقرأ على مهل رغم حجمه الصغير، ترشيح قوي لأي حد بيعاني ف حياته بشكل أو بأخر...رحمة الله على أسامة الدناصوري وكل الطيبين

#قراءات_حرة

#قراءات_رمضانية

#قراءات_ابريل

#الكتاب_رقم14

14/1