#سفريات2024

#باكون_ومضحكون

"بين الشاشة والحياة...رحلوا وفي القلوب سكنوا"

فيه كتب كتير بتتكلم عن السير الذاتية لفنانين عن طريق المذكرات أو المعلومات المجمعة من مصادر كتير

ف العصر الحالي اللي سمته السرعة والإأيجاز، بحب الكتب اللي بتحكي عن فنان أو أي شخصية عامة بشكل مركز، السهل الممتنع إنك تلاقي كتاب بالشكل اللي وصفته دة

في كتاب"باكون ومضحكون" للكاتب"محمد حليم" والصادر عن "دار الرسم بالكلمات"، إحنا على موعد مع كتاب من نوع"السهل الممتنع"، الكتاب اللي رصد ببراعة سيرة ذاتية لمجموعة كبيرة من الفنانين وف نفس الوقت بيسرد لنا التطورات الإجتماعية والسياسية في مصر على مدار عصرين، ماقبل ومابعد ثورة يوليو 1952

الكتاب متقسم ل 3 أقسام

الأول: ضحكات عالية وأعماق باكية، في الجزء دة بنتعرف على محياة مجموعة من أشهر نجوم الكوميديا زي "حسن فايق" صاحب الضحكة الأشهر في تاريخ السينما المصرية، "وداد حمدي" أشهر خادمة في السينما، زينات صدقي أشهر عانس رغم زواجها المتكرر، غيرهم كتير

في الجزء دة كانت المعلومات جميلة زي إن حسن فايق إقتبس ضحكته الأشهر من أحد الباشوات اللي كان بيحضر العروض المسرحية في شارع عماد الدين، إزاي كانت نهاية وداد حمدي المأسوية، غدر الجميع ب عبدالفتاح القصري

القسم الثاني: يهود ولكن أوفياء

هنا كانت معلومات أغلبها جديد بالنسبة لي، زي إن أول بطل الأفلام إتسمت على إسمه كان "شالوم" الإسكندراني مش سلسلة أفلام إسماعيل ياسين ودة اللي أغلبنا يعرفه ومن الكتاب :

"شالوم الترجمان"، وأنتجه توجو مزراحي عام 1935 وهو أهم أفلام الفنان شالوم، حيث أطلق اسمه على الفيلم، ليعد من بعدها أول فيلم في تاريخ السينما المصرية يحمل اسم بطله، وليكون شالوم، الممثل الأول في مصر الذي تحمل الأفلام اسمه"

عرفت كمان عن حياة مجموعة من الفنانين المصريين اليهود زي"دادة حليمة أو ثريا فخري، إلياس مؤدب، منير مراد وغيرهم

عرفت كمان عن محاولات الجماعات الصهيونية لتجنديهم وإقناعهم بالهجر لـ إسراeيل ورفض الغالبية لدة رغم الإغراءات الكتيرة جداً بالشهرة والمجد في الوطن الجديد، إزاي إن الفنانين دول ساهموا ودعموا المجهود الحربي ف حرب الإستنزاف

القسم الثالث: فنانات تركن لغزا بعد رحيلهن

هنا كان الحديث عن النهاية الغامضة لفنانات زي صاحبة الصوت الملائكي"أسمهان"، كاميليا ذات الجمال النادر، ست الحسن"سعاد حسني"

الكتاب اتميز بأسلوب عرض لطيف ومركز، مع التأكيد على معلومات بعينها، التركيز طول الوقت على الصعوبات اللي واجهت كل فنان لحد م بدأ طريق الفن والتضحيات اللي عملها عشان يكمل ف طريقه اللي حبه

الصور الفوتغرافية كانت جميلة مع بداية مميزة لكل فصل عن فنان بعينه

الغلاف...عبقري بالنسبة لي

على كثرة صور السندريلا ف الغلاف عليه صورة بتجمع بين الشجن والضحكة، في رسالة واضحة عن معنى الكتاب...هايل

في المجمل الكتاب جميل، مكتوب حلو قوي، بشكل مركز بدون إخلال

#قراءات_حرة

#قراءات_يناير

2/1