بصراحة أنا محتار و مش عارف أبدأ منين في كلام كتير يتقال عن العمل ده.
خلينا نبدأ من قبل معرض ٢٠٢٤ و الإعلان عن العمل و طريقة الإعلان عنه كانت ملفتة للنظر ومن ساعتها و انا منتظر اقرا العمل .
دي القراءة التانية بعد قرية الخطايا السبع لكن أنا هعترف أني في الخطايا السبع ما لحقتش افهم دماغ مونتيز و ده بسبب صغر العمل .. العكس تماما حصل في العشاء السري انا حاليا اقدر اقول اني فاهم تركيبة دماغ الكاتب ده.
مونتيز مش كاتب روايات جريمة معتمدة علي فكرة من القاتل أو فريق تحقيق غرضه كشف غموض الجريمة.. مونتيز كاتب بيعتمد علي الغوص في أعماق النفس البشرية و يورينا ممكن تعمل ايه تحت الضغط و الظروف الخارجية و عشان كده انا شايف بعد ما خلصت قراءة العشاء السري أنه لا دموي ولا سادي ولا عنيف.
ايوه من غير ما حد يستغرب ده البشر هي اللي بتعمل ده هو بس بيقدر يصور ده صح جدا حتي احنا في مجتمعنا المصري حاليا بقينا بنشوف و نسمع عن جرائم عمرنا ما كنا نتصور أنها ممكن تحصل في بلدنا كنا بس بنسمع عنها في دول معدل الجريمة و العنف عندهم أعلي من معدلنا.
نقطة أخيرة قبل ما ارجع للعمل كل مجتمع في العالم مختلف عن التاني و الادب المترجم دوره أني اتعرف علي طبع المجتمع ده مش شرط اتفق و اعجب بيه خالص بل ممكن اكره.. النقطة دي رد علي تعليقات شوفتها بتنتقد اختيار الدار لترجمة العمل.
نرجع تاني للرواية اللي بعتبرها تشريح في تفاصيل المجتمع البرازيلي و بيوضح الكاتب مشاكل المجتمع من الفساد و الطبقية و الفقر و مشاكل البطالة اللي فيها تشابه بين بلاد كتير.
بناء و رسم الشخصيات و تناقدتهم بالنسبالي مرسوم بالمسطرة كل شخصية من شخصيات العمل الرئيسية اللي بعتبرهم ٦ شخصيات كل واحد ممكن تتعاطف معاه و ممكن تكره المشهد اللي بعده عادي جدا تحس منهم ضحية و تحس منهم جاني .. قدر هذا المونتيز أني يطلع أسوأ ما في النفس البشرية في العمل و بين أني ممكن شخص يضرب بكل الأخلاق و المبادىء عرض الحائط عشان الفلوس و عشان يحس انه ناجح حتي لو ده علي حساب إنسانيته.
استكفي الكاتب بكده لا ده جيه في الربع الأخير من الرواية و المفاجآت و الصدمات كانت رهيبة بس بالرغم اني الحبكة قوية الا أني كان جوايا بعض الشك فكام نقطة و طلع نوعا ما صح.. بالرغم من الحبكة و التوسيت اللي معمول في الاخر الا اني غير راضي عن بعض النقط في نهاية العمل و كان ممكن تتعمل محبوكة عن كده بالنسبالي هو كان لازم يوضح بعض الامور بشكل واضح من كده و تبقي في مشاهد واضحة عشان نعرف تسلسل الاحداث اللي حصلت .
نيجي بقي للأستاذة المترجمة فاطمة محمد ايه ده يا شيخة ١٠/١٠و نجمة ترجمة حلوة جدا ضافت للعمل قوة فوق قوة أحداثه ..ترجمة نموذجية تتدرس 🎩