عمل جديد لمونتيز يبقي اكيد هنشوف جرعة جنان وسايكو غير طبيعية ودا شيء هو نجح انه يتميز بيه..

وفي العمل دا وصل لدرجة عالية من الخروج عن السيطرة...

على الرغم من تكرار الفكرة وأنها طبعا مش اول مرة تتعمل يعني.. إلا ان الي وصل الجنان هنا لدرجات عالية هو طريقة التناول...

طريقة تعامل شخصيات العمل مع ما يحدث وتطور وتوسع الفكرة ((الي زي ما قلت اتعملت كتير قبل كدا))

لأن الجنون هنا ان الكاتب وصلك ان المشاهد الشنيعة دي تبقي عادية ((في قلب الاحداث)) وهنا بقا هو الجنان...

طبعا الرواية دي 18+ ومش هبالغ لو قلت 21+ مش عشان الإباحية بس لا لا الموضوع اكبر من كدا ⚠️⚠️⚠️

قصة العمل عبارة عن اربع شباب.. دانتي وهو دا الي بنشوف من عنيه الاحداث (الراوي)

و ليتاو، هوجو، وأخيراً منيجيل..

شباب جامعين عايشين في سكن واحد والدنيا حلوة وكل واحد منهم عايز يبني مستقبله ويكون حاجة كبيرة.. لكن..

وعكة اقتصادية بتمر عليهم بتغير حياتهم بشكل مرعب وغير متوقع ولا حتي في أشد كوابيسهم... وبيصبحوا مديونين لسمسار السكن بملغ كبير نسبيا وفترة سداد محدودة ((اسبوعين))..

وهنا جت لهم فكرة من وراها ممكن يعملوا فلوس .. فكرة عادية جدا وهي باختصار تقديم وجبات عشاء عن طريق صفحات علي النت ومنهم واحد بالفعل طباخ شاطر والي هو هوجو.. ف ليه لا..

لكن الموضوع بيوسع ويتوسع حتى يأخذك لعالم شنيع..

شخصيات العمل الي تم ذكرهم هم الابطال مع شخصية نسائية اخري مش عايز اتكلم عليها عشان الحرق لكنها مهمة..

الشخصيات هم صُلب العمل والمحرك الأساسي للأحداث.. اختلاف شخصياتهم واختلاف طباعهم ودوافعهم هو الي خلق جو ممتاز.. في منهم الي جبان ومغلوب علي امره.. المتهور.. الي ماسك العصاية من النص ومشتت بين نارين.. الي مكبر دماغه ومش فارفه معاه حاجة... وهكذا

والكارثة الي هم وقعوا فيها اظهرت عصارة كل منهم وجوانبه المظلمة..

العمل ممتاز من حيث التسلسل والبناء للاحداث.. وازاي اقنعك ان الي بيحصل عادي وفيه ناس بتاكل منه عيش وفاتح شركات ومصانع وبيصدر!!

لكن انت ك قارئ مصدوم بس مش عارف تعبر زيك زي البطل.. متكتف

العمل فيه مشاهد والله تجيب اكتئاب لأنها طبعا بتعمل اسقاطات علي الحياة الواقعية.. دا غير ان في مشاهد لو خيالك واسع اوي ممكن تجبلك غثيان فوري وهلع من مجرد تخيل انها تحصل في الواقع (وعلى فكرة انا بجد مش قادر انكر ان دا يكون بيحصل بجد) كارثة!!

وطبعا الرواية فيها ألطواءات صادمة لحد اخر صفحة ونهاية اقل ما يقال عنها ((عنيفة))

عمل عميق وبيمري كذا اسقاط.. سياسي واجتماعي.. وطبعا أخلاقي وديني

والناس النباتيين هيحبوا العمل دا من ناحية إسقاط فكرة معينة

بس كدا.. برشحوا جدا لأنه يستاهل والنجمة الي شلتها كان بسبب بطئ رتم الاحداث في نص التلت التاني بس كان مطلوب عشان البناء يكون قوي.. ♥️