🔪اسم العمل : وقريبًا سيحل الظلام

🔪اسم الكاتب : خالد أمين

ثانية واحدة بس يا جماعة عشان نفهم!!!

بقالي ساعات بحاول أستجمع خطوط الرواية.

فاكرين لما قلت على العالم الروائي للكاتب خالد أمين إنه عالم مقبض بيفكرني بعوالم مدينة جوثام لو كانت في الشرق؟؟

رواية "وقريبا سيحل الظلام" هي الدليل العملي العلمي على حقيقة النظرية دي.

حرفيا أنا كنت بقرأ وحاسس وكأني في أجواء فيلم batman the dark knight rises الموسيقى المتوترة حرفيا كانت عمالة ترن في وداني.

ومن غير ما نضيع وقت طويل يلا بينا نبدأ المراجعة زي العادة.

وخلونا نبدأ مع الانطباع الأخيرة

من المرات القليلة اللي خلصت فيها قراءة ولقيت نفسي مبرق ومش قادر افكر أو خلوني أقول متنح ومفيش صوت حوالين مني خالص.

عارفين الشعور ده؟؟

أنا فعلا مكنتش عارف استوعب كل الدراما دي، ومش عارف اتخطى النهاية والأحداث والحبكة.

وعشان محدش يفهمني غلط خلوني أقول إن انطباعي بعد رواية "وقريبا سيحل الظلام" هو كان نفس انطباعي بعد مشاهدة فيلم avengers endgame.

ويلا بينا ندخل على الانطباع الأول والبداية والافتتاحية.

الانطباع الأول مع الغلاف القاتم الدموي والعنوان وخلوني أقول للمرة التانية أو التالتة تقريبا إن كلمة الظهر من وجهة نظري مش أحسن حاجة ممكن تعبر عن الرواية.

كان من الواضح إن العمل ينتمي للجريمة والمغامرة أو عالم التحقيقات مع شوية رعب.

لكن لو أنت عارف الكاتب وأعماله فأنت لازم تكون متأكد إن العمل رعب نفسي في المقام الأول.

وطبعا كنت متحمس جدا للقراءة وقلت أكيد الرواية دي هتخلص في جلسة واحدة يعني وفعلا ده اللي حصل.

وتعالوا نبدأ الرواية مع جزء من مذكرات جادو وهو في الحقيقة مجرم أو خلونا نقول سفاح وده طبعا بيفكرنا ببداية رواية "زائر منتصف الليل" ومن هنا ندخل على طول على جرائم قتل فظيعة ورهيبة والغرض منها نشر الرعب في قلوب الناس.

ومعانا رجل غني جدا قرر قبل ما يموت يجمع فريق عشان يتصدى للسفاح ده ويكشف عن شخصيته الحقيقة وده طبعا يفكرنا بفكرة بروس وين في جمع فريق عصبة العدالة.

وفعلا ينطلق الخادم الوفي - شبيه ألفريد في عالم باتمان - في رحلة جمع الفريق.

يعني في أول خمسين صفحة عندنا جرائم مروعة تحمل توقيع "جادو" - وهو حاجة كده تفكرك بشخصية الجوكر بس على ميلودراما شبيهة بسفاح النساء، وألغاز وتحديات وفريق من أصحاب القدرات الخاصة وكل ده فعلا يسحل أفكارك معاه ويخلي النوم يطير من عينك.

الرواية جامدة جدا جدا لولا بعض الأخطاء الإملائية ما بين الوقت والثاني وعندنا عودة لكل الشخصيات الرئيسية في عالم الكاتب ومنهم طبعا "ناردين" "صلاح" و"حاتم" و"آدم" ومعانا ظهور قوي جدا لقصر الشر أو "قصر سليمان" وقرية الشمع.

ومش بس كده ظهر معانا شخصيتين جداد خالص انا مقريتش عنهم قبل كده وكان نفسي بصراحة أعرف عنهم قبل كده وهما "سليم" و"رودينا" و"عامر" و"رشدي" وآخرون مش عايز أذكرهم.

بشكل خاص كان تقديم الشخصيات دي حلو وسريع لكن أنا عندي لسه فضول واسالة كتير عنهم محتاجة إجابة.

كان نفسي جدا تظهر شخصية "آيتن" من رواية "ذات مرة في الطريق المظلم" بس يلا حصل خير.

وطبعا هنا لازم نتكلم عن الشخصيات يا جماعة.

الشخصيات في الرواية

الشخصية الرئيسية في الرواية هي "جادو" محور الشر في الرواية وكل الشخصيات التانية كانت أبطال محورية أو خلونا نقول فريق التصدي ومحور المقاومة.

كل شخصية في الرواية سواء كانت شريرة أو واقعية أو صاحبة قدرة خارقة ليها نمط ولغة وفكر وبسهولة ممكن تتعلق بيهم وتحبهم وتتعاطف معاهم.

عندنا مواجهة أولى وثانية وثالثة ورابعة وفي كل مواجهة شخصيات الفريق بتتغير وتنضج وشخصية جادو كمان بتتغير كل ده على خلفية مدينة الشمع وقصر سليمان والسفينة الملعونة.

الكاتب كان عبقري يا جماعة في توزيع الشخصيات وضبط إيقاع الرواية ما بين إيقاع سريع إلى سريع جدا.

نسبة التوتر والقلق والغموض كبيرة.

يمكن الرجل الذي عض التراب كان مخيب للآمال بالنسبالي - كنت مستني منه حاجات كتير أعظم وأكبر - ومعنديش تفسير لحد دلوقتي لبعض الأمور لكن بشكل عام أنا كنت مسحول وراضي عن تجاهل بعض التفاصيل الصغيرة.

وتعالوا هنا نتكلم عن الحبكة والفكرة.

طيب من الواضح طبعا إن الحبكة معقدة تشبه إلى حد كبير حبكة فيلم "avengers infinity war" من حيث التعقيدات ومسار محور الشر وللأسف انا مش هقدر أحرق أي حاجة في الرواية.

لكن خلوني أكون واضح إن الرواية مش سطحية خالص، الرواية تطرح فكرة مهمة وبطريقة جديدة وعبقرية وعندنا هنا رسالة قوية واضحة يمكن تم التركيز عليها بشكل مباشر أكثر من مرة من غير ما يغير إيقاع الرواية.

مش محتاج ذكاء كبير عشان تعرف إن "جادو" هو تمثيل لشر معين أو مركب من الشرور السبعة.

أجمل ما في الرواية هي العالم الروائي الواقعي والمتكامل اللي أحنا بنتعامل معاه.

عندنا تأثر واضح بالأدب الغربي لكن بطعم وصياغة وتمصير حقيقي رائع.

طبعا عندنا كروس أوفر وكام بلوت تويست حلو وكام خط مفتوح على الجديد منه في عالم الكاتب.

طبعا للمرة اللي مش عارف كام لازم نتكلم عن خيال الكاتب والثقافة بتاعته وقدرته على وضع الرعب والتوتر في ذهن القارئ من خلال اللفظ والكلمة والجملة.

وتعالوا هنا نتكلم عن اللغة في الرواية.

طبعا العمل بالكامل بالعربية الفصحى وعندنا وصف بطبيعة الحال عبقري وحوار قوي جدا ومكثف وطبعا ممكن تستخرج شوية اقتباسات كده عنب أحمر من غير بزر زي مثلا.

" الجحيم هو أن تقضي حياتك بأكملها في حافلة لا تصل إلى وجهتها.. "

" الخيال هو القدرة على الهروب من الواقع..‫ وأحيانًا هو الوسيلة لهزيمة الواقع. ❝

وأخيرا خلونا نتكلم عن الخلاصة

النهاية كانت حلوة ومثيرة للخيال ومنتظر الجزء الثاني من الملحمة دي.

مشكلتي بقى هنا إن أنا كنت أتمنى نهاية غير كده خالص.

الخلاصة إن الرواية فظيعة يا جماعة لكن في مشكلة بتقابل كل واحد مقراش للكاتب قبل كده.

لذلك ننصح بشدة بقراءة أعمال الكاتب من القديم للجديد عشان المتعة تكون أجمل.

ولو مش عندك وقت تقرا كل أعمال الكاتب فعلى الأقل لازم تقرأ "إنهم ياتون ليلا" و"ذات مرة في الطريق المظلم".

أما عن العمل المفضل بالنسبة ليا فهو "جرائم الغراب السبع" ثم "زائر منتصف الليل"

#أحمدمجدي