🔪اسم العمل : ذات مرة في الطريق المظلم
🔪اسم الكاتب : خالد أمين
بصوا بقى يا جماعة دي مش اول مره اقرأ للكاتب الرائع خالد أمين ومش هتكون الأخيرة إن شاء الله.
والصراحة أنا بشكر معرض مكتبة الإسكندرية اللي خلاني أتعرف على الكاتب ومن الآخر كده الكاتب خالد أمين ده أكتشاف يا كوتش.
أنا بدأت قراءة مع "جرائم الغراب السبعة" و"إنهم يأتون ليلا" و"زائر منتصف الليل" ودلوقتي مع رواية "ذات مرة في الطريق المظلم"
أصلا من الحاجات اللي لازم تعرفها كده؛ إن الكاتب عامل عالم روائي خاص بيه وإن كل أعماله مميزة بطابع رعب نفسي دموي ومعوي كمان.
كل رواية أو كل عمل هنا مستقل ومحقق لذاته ومرعب وقاتم لوحده لكن هتلاقي إن كل عمل كمان سايب خط درامي أو اتنين مفتوح على باقي الأعمال.
وكنت عارف إن رواية ذات مرة في الطريق المظلم هو عمل طويل نسبيا وفيه هنتعرف على شخصية الرجل الذي عض التراب وشخصية آدم.
وزي العادة خلينا نبدأ مع الانطباع الأخيرة
بعد ما خلصت القراءة لقيت حكيم عمال يغني جنب وداني ويقول:
"قلبي يا هو، حب يا هو، والأحباب جرحوه … هما اتهنوا فرحوا وغنوا وأنا غنيت ظلموه …
سابني وباعني وياما لاوعني وليه موقفش جنبي؟ … كنت بقيدله شمعي، وبيحلاله دمعي، ده الإخلاص في طبعي واتعودت عليه … واللي مأثر فيا إنه محسش بيا، بعد العشرة ديه باعني وهونت عليه"
وانا مش عارف ليه حكيم داخل في كل انطباعاتي الأخيرة في الفترة دي بس اللي قرأ الرواية هيعرف ايه الحكاية وليه الأغنية دي بالذات.
ويلا بينا ندخل على الانطباع الأول والبداية والافتتاحية..
غلاف قاتم وعنوان جذاب "ذات مرة في الطريق المظلم" ومعانا كلمة تحت كده بتقول "لنتوغل بعيدا عن الشاطئ" وكمان كلمة الظهر اللي بتقول "الآن يبدأ الجنون.. الآن يبدأ العبث.. والآن نستضيف الكابوس .."
انا عن نفسي كنت شاري ومتحمس جدا للقراءة وقلت أكيد الرواية دي هتخلص في جلسة واحدة يعني وفعلا معرفتش أنام غير لما أخلصها.
وعلى طول ندخل على أول صفحات وتبدأ الرواية بداية مرتبكة شوية مع زوجين على الطريق راجعين من رحلة.
بصراحة الافتتاحية كانت مش مرعبة مش مثيرة مفيش مشهد قاسي أو لغز قوي وده كان غريب، فين اللغز؟؟ فين الرعب؟؟ فين المصيبة؟؟ أين الخازوق؟؟
اينعم احنا بنتعرف على الزوجين لكن مفيش حاجة تلفت النظر هنا خالص أو هكذا خطط الكاتب.
وفجأة - آن آن آن - يدخل الشرير على الخط ويرتفع الترقب والغموض ونبدأ نسأل ونستغرب ويرتفع الحماس والترقب وفي لحظة كده ممكن تفتكر انك دخلت في أجواء فيلم "Wrong turn" وأخيرا تحصل الكارثة أو الجريمة ونشوف ليه البطل أو صاحبنا عض حرفيا في التراب.
وهوب هوب هوب تمر خمس سنين والرواية تدخل بينا في عالم غموض وتحقيقات وجرائم وصفحة ورا صفحة وشلوط ورا شلوط تلاقي نفسك تندفع للأمام ناحية النهاية.
وهنا ممكن نتكلم عن النهاية.
عندنا تويست حلو في نهاية الرواية يمكن بالنسبة ليا كان متوقع شوية بسبب كلمة أو تلميح في نص الرواية لكن انا برده اتفاجئت.
طبعا النهاية نقدر نعتبرها نهاية قوس الشخصية الرئيسية بتاعتنا واللي لازم تفتح الباب والشباك على أفكار كتير.
القارئ اللي زيي كده ممكن يلاحظ تشابه كبير جدا أو خليني أقول تشابهات ما بين العالم في نهاية الرواية وبين عالم سلاحف النينجا المتحولين أو عالم مدينة جوثام.
عشان كده بكل أريحية ممكن أقول إن نهاية الرواية هنا هي التمهيد الحقيقي لعالم روائي متميز وعد عندك الميزات.
عندنا عالم مغاير هو مشابه للعالم بتاعنا بس مش هو بشكل صريح وأي تشابه ما بينه وبين العالم الواقعي بتاعنا هو من منطلق الفن والإبداع.
عندنا أبطال أو شخصيات ليهم دوافع قوية وتركيبة نفسية وجسمانية وخلفية تخلي منهم أبطال خارقين أو شخصيات ذات صفات ملحمية.
عندنا شر مطلق مبرر وله قوة محسوسة وملموسة ويمكن إسقاطها على حاجات كتير جدا واقعية حوالين مننا زي ما ظهرت في رواية إنهم يأتون ليلا إسقاطا على الاكتئاب مثلا.
عندنا خيال رائع وكاتب واعي ومثقف قادر على فتح روايات على بعضها واختلاق شخصيات جديدة ذات أبعاد نفسية متميزة وطرح أفكار حقيقي مؤثرة.
وهنا لازم نستعرض الفكرة والغرض والهدف
بمجرد ما دخلت في أجواء الرواية والفكرة المسيطة على دماغي هي فكرة قوة الغضب والانتقام والتأثير النفسي للظلم الساقط على الروح.
إزاي إنسان بسيط ممكن يتحول إلى قوة كاسحة،
عندنا جزء مؤثر في الرواية ممكن نعتبره رومانسي وشاعري وممكن نلاقي فيه شوية مداعبة للمشاعر، وعندنا قدر كبير من الرواية وتحديدا في النص التاني بيتكلم عن الحقيقة وفلسفة معرفة الحقيقة والفرق ما بين الجنون والوعي بالحياة المجنونة.
عندنا أفكار كتير في الرواية مستترة شوية لكنها واضحة جدا وصاخبة وعندك لحظات ملحمية تحس معاها انك ممكن تنفجر من الغضب.
وتعالوا هنا نتكلم عن اللغة في الرواية.
طبعا العمل بالكامل بالعربية الفصحى وعندنا وصف بطبيعة الحال عبقري أو خلوني أقول مليان تشبيهات راقية جدا ومفيش تكثيف للحوار لكن عندنا شوية حوارات تلف الدماغ بجد وتخليك مش قادر تمسك نفسك وتسرح بخيالك وممكن تستخرج شوية اقتباسات كده لوز اللوز زي مثلا.
"وكأن الجنون والألم قد وجدا مكانهما بين ضلوعه، وقررا أن يتزاوجا لينجبا هذا الرضيع الصاخب الذي سرعان ما يتحول لعملاق ثائر.. الغضب.."
ولازم هنا نتكلم عن شخصيات العمل
الرواية قاتمة جدا جدا وكل شخصيات العمل مرسومة بعناية شديدة حتى ضابط التحقيق في القسم، وعندنا شخصية "أيتن" لازم نشوفها تاني في عمل قادم للكاتب.
أما عن البطل والشرير فخد بالك أنت قدام بات مان وجوكر بشكل جديد تماما.
عندك شخصية مبررة وعقلانية تتحرك بفعل الغضب وشخصية هي العبث والجنون في ذاته.
وأخيرا خلونا نتكلم عن الخلاصة
النهاية كانت مرضية جدا بالنسبة ليا وفتحنا نافذة أو سرداب في العالم بتاعنا الروائي الجديد.
عندي طبعا شوية أسئلة ومحتاج نقاش مع الكاتب حولها لكني متحمس لرواية ليلة ظهور القرين واللي هبدأ فيها مباشرة الآن.
الرواية حلوة أوي قابضة جدا نقدر بسهولة نشوف الأجواء بتاعتها وكأنها فيلم من أفلام كريستوفر نولان أو زاك سنايدر.
اعتقد إن عالم الكاتب خالد أمين الروائي إن شاء الله هيكون هو عالم "جوثام الشرق"
#أحمدمجدي