🔪اسم العمل : قضية ست الحسن : تحقيقات نوح الألفي

🔪اسم الكاتبة : ميرنا المهدي

مش اول مره اقرأ للكاتبة ميرنا المهدي وأكيد مش هتكون الاخيرة.

قرأت قبل كده "دليل جدتي لقتل الأوغاد" وعجبتني جدا جدا جدا والنهاردة معانا رواية "قضية ست الحسن : تحقيقات نوح الألفي".

طبعا كلنا عارفين إن نوح الألفي وصديقه قطز كان لهم ظهور في رواية دليل جدتي، وعشان كده كنت متحمس للقراءة.

ويلا بينا مباشرة على الانطباع الأخير

وبعد ما خلصت القراءة لقيت حكيم عمال يغني جنب وداني ويقول:

"ياللى تحب الجمال الحلو حلو الروح … في ناس جميلة أوي وعايشة حلاوة روح

وبأيه يفيد الجمال، لو عيشت بيه مجروح … اوعى الجمال يغرك أو تنخدع فيه

أصل الجمال لو غرك يكويك بنار لياليه … دا مهما كان الجمال، مسيره بكره يروح

دا عشق الجسد مش دايم، لكن اللى دايم حلاوة روح … ليلي ليلي ليل ياعين ياليل"

وطبعا اللي قرأ الرواية عارف ليه الأغنية دي بالذات.

ما علينا

لازم تاخد بالك من حاجة مهمة وهي إن رواية قضية ست الحسن : تحقيقات نوح الألفي مش رواية نمطية وإنما ممكن نعتبرها 3 روايات قصيرة أو 3 نوفيلا أو خلينا نقول 3 تحقيقات.

وهنا خلونا نتكلم عن الانطباع الأول

كنت منتعش جدا ومتحمس جدا بسبب التقييمات الكتيرة الحلوة والمراجعات الحلوة أوي اللي قرأتها أو سمعتها عن العمل وكمان الغلاف مميز وجذاب وألوانه حلوة وجريئة.

يعني الانطباع الأول كان حلو وعشان كده دخلت على طول على المقدمة والافتتاحية.

مع الكلمة اللي على ظهر الرواية وهي مثيرة لكن من وجهة نظري كان في أحسن كتير.

ويلا بينا ندخل على البداية والمقدمة والافتتاحية.

تبدأ الرواية على لسان بطلنا نوح الألفي ونتعرف على حياته الشخصية وأخته ومشكلاته النمطية ونتعرف على قدراته غير الطبيعية.

المقدمة دمها خفيف جدا ورسم الشخصيات كان رائع وتقديم كل شخصية كان جذاب جدا وبصراحة جدا عجبتني جدا أجواء الرواية ومع أول خمس أو ست صفحات أنا كنت اندمجت فعلا مع العمل وجالي شعور إني مش بقرأ عمل أدبي لكن أن بشوف فيلم أو مسلسل تلفزيوني ده بسبب اللغة طبعا.

ويلا بينا هنا نتكلم عن اللغة.

اللغة والسرد بالعربية الفصحى لكن الحوار بالعامية المصرية.

والمشكلة إن السرد والوصف كان قليل فعلا عن المعتاد وكان في كثافة كبيرة في الحوار وده ساعد كتير في إني احس اني بقرأ سيناريو مش رواية.

خلونا دايما فاكرين إن الحوار مش لازم يكون كتير في الرواية.

وطبيعي هنا إنه ميكونش في اقتباسات لغوية كتير أو مفيش استعراض لغوي وطبيعي يكون تأثير كثافة الحوار سلبي على الرواية لكنه كان إيجابي جدا على العمل وفكرته وهنا خلونا نتكلم عن العمل نفسه وفكرته.

فكرة العمل وطبيعته.

زي ما كنت قلت في البداية إني بمجرد ما بدأت قراءة في التحقيقات وأنا حاسس إني بتفرج على مسلسل تلفزيوني وده يخليني متأكد إن فكرة الكاتبة هنا هي إنها مستهدفة طبقة الشباب من القراء الناشئين.

يعني فكرة العمل بكل بساطة هي صناعة عمل بسيط ظريف فكاهي، حاجة كده تكسر بيها مود الاكتئاب.

في حرق هنا ولو مقريتش العمل تجاوزها لو سمحت

وخلونا هنا نحرق حاجة في الرواية وهي إن فكرة العمل الرئيسية هي المحقق الذكي أو ضابط المباحث اللي بيقدر يتكلم مع أرواح الميتين.

أنا شفت الفكرة دي كتير جدا في أفلام ومسلسلات أجنبية وانا عن نفسي كتبت قصة من زمان على اليوتيوب في نفس الموضوع - هحاول أحط الرابط في التعليقات -.

ولازم هنا التأكيد على إن تصور الكاتبة ومصادر فكرتها عن الأرواح أو الأشباح بالكامل من خلال الأفلام والأعمال السابقة وخيال الكاتبة وده طبعا مخالف لكل الحقائق في القرآن والسنة النبوية عن التعامل مع الروح.

خلصت فقرة الحرق وتقدر تيجي هنا

نقدر نقول إن فكرة العمل والهدف منه الترفيه ورسم البسمة مع لمحة من المغامرة والتشويق في العمل مع الاستمتاع بتجربة شخصية مع أبطال العمل.

ولما تيجي سيرة شخصيات العمل يبقى يلا بينا نتكلم عن الشخصيات.

شخصيات العمل مش كتير خالص في كل تحقيق عندنا عدد محدود جدا جدا من الشخصيات والعمل معتمد على العلاقات ما بين الشخصيات الرئيسية في العمل مع الشخصيات الضرورية في كل تحقيق.

تحقيقات نوح الألفي الرواية الأولى قضية ست الحسن عبارة عن 3 تحقيقات عشان نقدر نوصل لنقطة انطلاق في الشخصية.

ويحسب هنا للكاتبة إنها من خلال الحوار قدرت ترسم كل الشخصيات كويس بطريقة تخدم القصة والفكرة والمتعة في القراءة.

وهنا ممكن نتكلم عن النهاية.

النهاية كانت نمطية جدا لكنها ومرضية بشكل ما لكل القراء ويخلينا ندخل مباشرة على العدد التانية اللي هي قضية اللوز المر.

العمل حلو ومناسب جدا لكل الشباب والبنات وقابل للتحويل لمسلسل صغير من مجموعة حلقات.

#أحمدمجدي