#أحمدمجدي
زي العادة خلونا نبدأ مع الأنطباع الأخير.
العدد الأول خلص في وقت اقل من ساعة قراءة متواصلة، وده طبعا عشان العمل صغير جدا في الحجم.
وأول ما وصلت للنهاية وخلصت العدد الأول لقيتني فاتح بقي وبقول في نفسي "يا حلاااااوة" بصوت مظهر أبو النجا.
ومن هنا يلا بينا على البدايةمع الانطباع الأول.
الأنطباع الأول كان مع ريفيوهات ومراجعات وتقييم كتير من الاصحاب وكنت متوقع حاجة ليها علاقة بالاختراقات السيبرانية وكان عندي حماس شغف الكتب وعلى طول دخلت وحملت العدد وبدأت فيه.
وتعالوا نتكلم عن البداية والافتتاحية.
مباشرة ندخل السلسلة دي مع البطل بتاعنا حازم اللي شغال في الأمن السيبراني وعنده رهاب اجتماعي.
حازم شاطر جدا في شغله وله وجه غامض وحياة سرية وهي حياة الهاكر اللي بيقدم خدمات من خلال الديب ويب.
وبشكل عام المقدمة والأفتتاحية والتعريف بالبطل كان جذاب ومناسب.
ويلا بينا نتكلم عن العمل وفكرته.
فكرة السلسلة معتمدة بالأساس على الانترنت والتكنولوجيا وفهم الكاتب بالنواحي التقنية الحديثة وده كان واضح جدا في تعبيرات الكاتب ولغته.
وهنا ممكن نقول تعالوا نتكلم عن اللغة في العمل.
العمل بالكامل باللغة العربية الفصحى البسيطة المباشرة السهلة،
مفيش حوار تقريبا الا في مشاهد بسيطة جدا.
طبيعة العمل والسرد ميسمحش اصلا بالجمل الحوارية الطويلة، احنا بنتابع أحداث سريعة وإيقاع منتظم متزايد في رتم سريع.
ومن هنا ممكن نستعرض الشخصيات
الشخصيات في العمل فهي قليلة جدا "حازم - زهرة - مازن - هايا" والرباعي بتاعنا سطحي جدا لم يتم التقديم ليها خالص.
الكاتب هنا متعلق بالاحداث وتتطور الحبكة وغير معني خالص بتقديم الشخصيات وبالتالي القارئ متعلقش خالص بأي شخصية.
عجبتني فكرة الفريق السيبراني وطريقة اجتماعهم وتقديم السلسلة للفكرة واعتقد اننا في الإعداد الجاية هنبدا نتعرف اكتر على الشخصيات.
وياريت نقل كتير في الكلام المتعلق بلاجوانب التقنية عشان انا بشكل شخصي مش مهتم بالجانب التقني.
الخلاصة ممكن نعتبر أن العدد الأول من سلسلة اكس هو قصة قصيرة تم تحويلها إلى نوفلا من خلال استعراض تقني غامض بالنسبة ليا لكنه كان جذاب وناجح في وضع بداية عالم كبير ولسه عندنا احتمالات كتيرة جدا.
طبعا يا ريت يتم إعادة النظر في المراجعة عشان انا حصل عندي شلل لما بطل السلسلة "حازم" فجأة يتحول إلى خالد في الفصل الاخير.
وأكيد بنصح بقراءة العدد.